Украинада кьиле физвай махсус серенжемда Россиядин, гьа гьисабдай яз Дагъларин уьлкведин аскеррини офицерри, игитвал къалуриз, жуьрэтлувилелди женг чIугвазва, чандилайни гъил къачуна, гъалибвилер къазанмишзава. Женгчийриз регьятзавач. Четин шартIаризни килиг тавуна, абуру дурумлувал, кьегьалвал, ватанпересвал къалурзава. МасакIа хьунни лазим туш… Ватандин итижар хуьзвай кьегьалриз, республикадин агьалийри хьиз, хейлин идарайри, тешкилатри куьмекар агакьарзавайди сир туш. Идалди женгчийрин руьгь хкажзава. Ахьтин идарайрин арада Россиядин Яшайишдин фондунин (СФР) Дагъустанда авай Управленини ава.
И йикъара Вирироссиядин халкьдин фронтдин (ОНФ) чи региондин исполкомдин председатель Жамалудин Шигьабудинован ва маса ксарин иштираквал аваз кьиле фейи гуьруьшдал Украинада кьиле физвай махсус серенжемда Ватандин вилик чпин буржи кьегьалвилелди кьилиз акъудзавай Каспийскдин флотилиядин къуллугъчийрив мергьяматлувилин куьмек агакьарунай анин командующий, контр-адмирал Александр Пешкова Дагъустандин Яшайишдин фондунин регьбер Мегьамед Исаеваз сагърай лагьана ва адав Чухсагъулдин чар вахкана.
ОНФ-дин чи региондин регьбердини Дагъустандин Яшайишдин фондунин патай “Всё для победы” проектдин сергьятра аваз пулунин такьатар кIватIунай М.Исаеваз сагърай лагьана. Абурухъ Украинада кьиле физвай махсус серенжемда иштиракзавай военный рекьяй къуллугъчияр патал женгера лазим шейэр ва пишкешар маса къачуна рекье турди къейдна.
Вичин нубатдай Мегьамед Исаева Каспийскдин флотилиядин регьбердизни чпин куьмекдиз еке къимет гунай сагърай лагьана ва Ватандин итижар хуьнин женгина авай военный рекьяй гьар са къуллугъчидин хизан патал идара гьам пенсийриз, гьамни яшайишдиз талукь месэлайрай куьмекар гуз гьазур тирдахъ инанмишарна.
Рагнеда Рамалданова
