РД-дин Гьукуматдин Председателдин заместитель Абдурагьман Магьмудован регьбервилик кваз полиомиелитдин аксина аялрин иммунитет хкажун таъминарунин месэладиз талукь совещание кьиле фена.
Адан кIвалахда властдин органрин кар идара ийидай руководителри, РД-да авай Росприроднадзордин управленидин векилри, муниципальный тешкилатрин кьилери, медицинадин идарайрин кьилин духтурри ва жавабдарвал хиве авай маса ксари иштиракна.
Совещание ачухайла, Абдурагьман Магьмудова къейдна хьи, аялрин арада иммунизациядиз талукь серенжем кьиле тухудайла, пландик кутунвай 95 процентдин чкадал анжах 70,2 процент аялриз рапар яна. Адан гафаралди, регионда полиомиелитдиз акси рапар 3 вацралай 9 йисал къведалди яшарин 437320 аялдиз яна кIанзава. А.Магьмудова хабар гайивал, Роспотребнадзордин идарадин меслятвални аваз, аялриз рапар ягъунин сад лагьай пай 2023-йисан 8-мартдалди кьиле фена. Кьвед лагьай пай алай йисан 3-апрелдилай 9-апрелдалди тухуда.
Роспотребнадзордин республикада авай управленидин регьбер Залимхан Омариева вичин рахунра къейд авурвал, аялрик пис азарар акат тавун патал гъвечIизмаз рапар ягъун, абурун иммунитет хкажун важиблу месэла я.
РД-дин здравоохраненидин министрдин сад лагьай заместитель Жавгьарат Исаевади лагьайвал, медицинадин идарайра аялриз рапар ягъун патал вакцина бес кьадарда ава.
Муниципалитетрин тешкилатрин кьилерал ва гьакI республикадин здравоохраненидин министерстводал вири аялриз герек рапар ягъунин кIвалах менфятлудаказ тешкилун тапшурмишна.
«Лезги газет»
