25-февралдиз Мегьарамдхуьруьн райондин Кчун-Къазмайрин хуьре, М.Ярагъидин тIварцIихъ галай спорткомплексда, азаддаказ кьуршахар кьунай “Лекидин Кубок” патал жаванрин ва аялрин арада турнир кьиле фена. Идакай чаз муниципалитетдин пресс-къуллугъди хабар гана.
Турнир тешкилнавайбур мергьяматлувилин “Леки” фонд ва Мегьарамдхуьруьн райадминистрациядинни (физический культурадин ва спортдин отделдин кьил — Элбрус Шагьвеледов) “Олимпиададин резервдин спортшкола “Самур” ГБУ-дин (директор — Мумин Гъаниев) куьмекни галаз райондин жегьилрин парламент (регьбер — Равид Азизов) тир. Спонсорар — электроникадин туьквен — “AppleYug”, алишверишдин компанияр — “Славица” ва “Райфрут”, эцигунардай материалар акъудзавай “FARDO”, эцигунардай материалар маса гудай “Араба” ва масабур тир.
Спортдин мярекатдин макьсад азаддаказ кьуршахар кьун машгьур ва пропаганда авун, жаванринни аялрин устадвал ва тежриба хкажун, республикадин жуьреба-жуьре районрай тир спортсменрин арада дуствилин алакъаяр мадни мягькемарун ва икI мад тир. Ана яшарин — 4 ва заланвилин 13 категориядай 200-далай виниз спортсменри иштиракна.
Къизгъиндаказ кьиле фейи акъажунра командайрин арада Минажидин Къазиеван гъилик устадвал ва вердишвилер къачузвай Белиждай тир жаванар 1-чкадиз лайихлу хьана. Турнирда Докъузпара райондин жаванрин командадини (ам 17 касдикай ибарат тир) хъсан нетижаяр къазанмишна. СтIал Сулейманан райондай и акъажунра азаддаказ кьуршахар кьунай ДЮСШ-да И.Царухаеван, З.Абдукамалован ва А.Мисриханован гъилик вердишвилер къачузвай ва устадвал хкажзавай жаванри иштиракна. ИкI, Агьмед Велиметова (57 кг) — 1, Сефихан Шихрагьимова (52 кг) -2 ва Ислам Алиметова (44 кг) 3-чкаяр кьуна. Гъалибвал къазанмишай ва приздин чкаяр кьур вири спортсменриз турнирдин спонсоррин патай медалар, дипломар ва пулунин пишкешар гана. Турнирдин иштиракчийри ам тешкилайбуруз ва спонсорриз сагърай лагьана, спортдин и серенжем гьар йисуз кьиле тухунин умудлувал къалурна.
«Лезги газет»
