ЦIи Махачкъалада, Етим Эминан 185 йисан юбилейдихъ галаз алакъалу яз, “Эминовские чтения” мярекат кьиле фида
25-февралдиз Махачкъалада Алкьвадар Гьасанан тIварцIихъ галай медениятдинни марифатдин центрадин нубатдин заседание кьиле фена. Ана “Лезги газетдин” кьилин редактор, центрадин директор Мегьамед Ибрагьимова, ДГПУ-дин профессор Шайдабег Мирзоева, РД-дин Общественный палатадин комитетдин председатель Ислам Мегьамедова, диндин алим Ямин Мегьамедова, архитектор Андрей Агъабалаева, жемиятдин векил Вячеслав Къурбанова, карчийри, меценатри ва масабуру иштиракна.
Мярекатдин эвел кьиляй Мегьамед Ибрагьимова мукьвара ДГПУ-да студентрин арада лезги публицистикадай кьиле фейи конкурсдин нетижаяр кьуна. И кардикай чпин фикирар лагьай Ш.Мирзоевани И.Мегьамедова мектебра, вузра дидед чIалан важиблувал къалурун патал тухузвай мярекатрин кьадар гзафарун герек тирди къейдна. Абурун фикирдалди, и месэладихъ акьалтзавай несилар хайи чIал чирунал, ам кIанарунал желб авунин жигьетдай еке метлеб ава.
Рахайбуру Алкьвадар Гьасанан тIварцIихъ галай центрада ДГУ-дин ва ДГПУ-дин факультетра лезги чIал чирзавай студентриз пулунин рекьяй куьмек гудай фонд арадал гъунин теклиф гана. Фондунин куьмекдалди студентриз гьар вацра махсус стипендия гуз жеда ва абуруз вузар акьалтIарайдалай кьулухъ, кIвалах жагъурунин карда центрадин векилри куьмек гуда. Теклиф вирида хъсанди яз гьисабна ва къведай заседанидалди и месэладиз талукь проект гьазурдайвал я.
Дагъустандин шииратдин классик Етим Эмин дидедиз хьайидалай инихъ 185 йис тамам хьунихъ галаз алакъалу яз, майдин вацра центради Махачкъалада “Эминовские чтения” лишандик кваз чIехи мярекат тешкилда. Адан сергьятра аваз, мектебра кIелзавай аялрин, студентрин ва лезги чIалан муаллимрин арада Етим Эминан шиирар кIелунай конкурс кьиле тухуда. И мярекатдиз акъатзавай пулунин такьатар меценат, центрадин активдин векил Шагьпаз Асаханова чара ийида.
Вячеслав Къурбанова вичин рахунра Кавказдин дяведин йисара Имам Шамилан наиб Ахцегьа телеф хьайи Ириб хуьряй тир Османан сур маса чкадал хутахунин жигьетдай кьиле тухузвай кIвалахрикай, мектебра кIелзавай аялар патал цIийи жуьредин партаяр гьазурун патал гъиле кьунвай проектдикай ихтилатна. И кьве кардани Алкьвадар Гьасанан тIварцIихъ галай центради иштиракзава.
Мярекатдал центрадин дарамат эцигун патал гьазурзавай проектдиз, Рамазандин вацра “Лезги газет” кIелзавайбурун арада тухудай Исламдин конкурсдиз, Дагъустандин архивда авай 1886-йисан хизанриз талукь сиягьрин куьмекдалди Кьиблепатан Дагъустандин гьи хуьре шумуд тухум авайтIа тайинарун патал гъиле кьунвай кIвалахдиз талукь месэлаярни веревирдна.
Центрадин нубатдин заседание мартдин вацран эхиримжи киш юкъуз кьиле фида.
Агьмед Магьмудов
