19-февралдиз Дербентда, Виридуьньядин милли чIаларин йикъан сергьятра аваз, шегьердин школайра лезги чIаланни литературадин тарсар гузвай муаллимрин гуьруьш кьиле фена. Ам тешкилайбур ФЛНКА ва Гьажи Давудан тIварцIихъ галай руьгьдинни марифатдин центр тир.
Ана Дагъустандин педагогикадин илимдинни ахтармишунрин институтдин пешекар Жаклина Мейлановади, ФЛНКА-дин векил Вакъиф Керимова, шегьердин 2-нумрадин школа-интернатдин директор Рагьман Асалиева, шегьердин общественный палатадин председателдин заместитель, Социально-педагогический институтдин проректор Агъаширин Давудова, лезги писателрин секциядин председатель Абил Межидова, шегьердин собранидин депутат Шихзагьир Мустафаева, шегьердин образованидин управленидин лезги чIалан методкIватIалдин кабинетдин заведующий Элейхалум Муталибовади, Лезги театрдин директордин заместитель Вадим Рамазанова, лезги чIаланни литературадин муаллимри ва масабуру иштиракна.
Мярекат “Женгинин баркаллувилин музейдин” пешекар Гуьлпери Шабановади кьиле тухвана. Ада гуьруьшдин иштиракчияр ФЛНКА-дин президент Ариф Керимова ракъурнавай тебрикдин чарчихъ галаз танишарна. Анал рахайбурун фикирар сад тир: чIал хвена, вилик тухвана, гележегдин несилрив саламатдиз агакьарун, чIал харчи тавун, аялриз хайи чIал кIанарун, мярекатар лезги чIалалди тухун. Абуру и кIвалахриз талукь теклифарни гана.
Элейхалум Муталибовади кIватI хьанвайбур и йикъара шегьерда кьиле фейи дидед чIаларин конкурсда 1-чка кьур Регина Алиевадихъ галаз танишарна, муаллимдиз агалкьун мубаракна. Эхирдай анал рахай Вакъиф Керимова дуьньядин пара чIалар квахьзавай девирда лезги чIалан муаллимри чIал хуьник ва ам вилик тухуник еке пай кутазвайди къейдна. И кардай ада муаллимриз сагърай лагьана, гележегда шегьерда лезги чIалал тешкилна кьиле тухудай мярекатрик ФЛНКА-дини къуьн кутадайдахъ ва куьмек гудайдахъ инанмишарна.
Дидед чIаларин суварин юкъуз мярекатда иштиракай вири муаллимриз ФЛНКА-дин патай пишкешар, цуьквер ва художник Каринэ Рамазановади гьазурнавай милли гамарин нехишар алай къуьнерихъ вегьедай шалар гана. Гуьруьшдин иштиракчийри Дербент шегьердин мектебра лезги чIалайни эдебиятдай тарсар тухузвай муаллимриз талукь эвер гун кьабулна. Эвер гуна хайи чIал хуьн ва саламатдиз гележегдин несилрал агакьарун патал агъадихъ галай теклифар ава:
аялдиз чIал чизватIани, чизвачтIани, эгер ам лезги ятIа, ам лезги чIалан тарсуниз желб ийин;
аялар Дагъустандин эдебиятдин тарсуниз ракъурзавай диде-бубайрихъ галаз алакъа хвена, абурун арада гъавурдик кутунин кIвалах тухун;
мектебра лезги чIалаз талукьарна кьиле тухузвай мярекатриз диде-бубайриз эверин;
аялри ва абурун диде-бубайри неинки мектебра, гьакI шегьерда кьиле физвай лезги маса мярекатрани иштиракун патал классрин собранийра абурухъ галаз таъсирдай ихтилатар ийин;
сифтегьан классра “Лезги чIалан югъ” кьиле тухун, и кардиз талукьарнавай мярекатда лезги аялар вири санал кIватIин, абуруз чи халкьдин махар, шиирар, гьикаяяр кIелин, адетрикай, тарихдикай ихтилатар ийин, лезги чIалал гьазурнавай мультфильмаяр къалурин.
Дербент шегьердин мектебра кIвалахзавай лезги тарсарин муаллимрин умуми кIватIал арадал гъин. А кIватIалда шегьерда дидед чIал хуьнин жигьетдай кьабулзавай вири серенжемар веревирд ийин.
Ибурулайни гъейри, Дербент шегьердин муаллимрин арадани хъсан алакьунар, чирвилер авай, пешекар муаллимар хкягъун патал са жерге маса кIвалахарни кьиле тухуда.
Къагьриман Ибрагьимов
