Ватан хуьдайбурун йикъан вилик Мегьарамдхуьруьн 2-нумрадин юкьван школадин цлал ина кIвалахай, Украинада кьиле физвай военный махсус серенжемда телеф хьайи муаллим Марат Селимоваз мемориалдин кьул ачухуниз талукьарнавай митингни кьиле фена. Ана Маратан багърийри, Мегьарамдхуьруьн райондин кьил Фарид Агьмедова, адан заместителри, Мегьарамдхуьруьн кьили, школадин муаллимри ва аялри, райондин идарайринни тешкилатрин регьберри ва масабуру иштиракна.
— Ватан хуьдайла, телеф хьайи Марат Селимовичан экуь къамат чи рикIера гьамиша амукьунин лишан яз, мемориалдин кьул ачухуни, военный рекьяй къуллугъдин везифаяр намуслудаказ кьилиз акъудайди хьиз, адан жуьрэтлувални квахь тийидайди тестикьарзава. Военный махсус серенжемда чанар гайи кьегьалрин къаматар эбеди авун, акьалтзавай несилдиз абурукай чирун ва чешне яз къалурун чи буржи я. Чна Маратан диде-бубадиз, юкь агъузна, икрамзава. Адаз тарс гайи муаллимриз сагърай лугьузва! — къейдна, митинг ачухдайла, райондин кьили.
Мемориалдин кьул Маратан буба Селим Селимова ва Фарид Агьмедова ачухна. Кьегьалдин экуь къамат рикIел хуьнин лишан яз, кIватI хьанвайбур са декьикьада кисна акъвазна.
Митингдал Мегьарамдхуьруьн администрациядин кьил Адил Муслимов ва школадин директор Мира Расулова рахана, чими келимайралди М.Селимован къамат рикIел хкана. Эхирдай райондин кьил школадин гьаятра къекъвена, Маратан бубади, вичин хцин къамат эбеди авун яз, школадин гьаятра кьур эцигнава.
«Лезги газет»
