Росгвардиядин Дагъустан Республикада авай Управленидин, гьакIни Докъузпара райондин администрациядин пресс-къуллугъри “Лезги газетдиз” хабар гайивал, 22-февралдиз Къалажухрин хуьрени мемориалдин кьул ачухуниз талукь митинг кьиле фена — Росгвардиядин сержант, “Жуьрэтлувиляй” ордендин сагьиб, Украинада кьиле физвай военный махсус серенжемда аскервилин буржи кьилиз акъуддайла, телеф хьайи Элшад Шагьвердиеван тIварцIихъ юкьван школа яна.
Э.Шагьвердиеван диде-бубадин, мукьва-кьилийрин, райадминистрациядин, Ахцегьрин погранкъуллугъдин, военный комиссариатдин векилрин, Росгвардиядин къуллугъчийрин, школада кIелзавай аялринни муаллимрин ва масабурун иштираквал аваз кьиле фейи митинг Къалажухрин юкьван школадин директор Рефат Сулейманова ачухна.
— Игитвал къалурай кьегьалрин тIварар абуру кIелай школайриз гунин адет фадлай авайди я. Им хъсан адет я. Адахъ акьалтзавай несил ватанпересвилин руьгьдаллаз тербияламишунин метлеб ава. Ватан хуьн вири девирра еке игитвал я. Къе чун хайи хуьруьн школадиз чи игит, вичин жегьил чан уьлкведин итижар хуьниз къурбанд авур Элшад Шагьвердиеван тIвар гун патал кIватI хьанва. Украинада военный махсус серенжем башламишай сифте йикъалай ам цавун бушлухар хуьз рекье тунай. Къалурай кьегьалвилерай ам “Жуьрэтлувиляй” ордендиз лайихлу хьана. Адан экуь къамат чи рикIера гьамиша амукьда. Игитрин тIварар эбеди авун чи буржи я! — къейдна Докъузпара райондин кьилин заместитель Салигь Гьажимурадова.
Росгвардиядин Дербент районда авай МОВО-дин къуллугъчи, полициядин прапорщик Ражаб Къурбанисмаилова лагьана:
— Куь хци вичин хиве авай везифаяр лайихлудаказ кьиле тухвана, ам игитвилелди телеф хьана. Адан тIвар Россиядин тарихда викIегь, жуьрэтлу, Ватандин экуь гележег патал вичин чан къурбанд авур аскер яз амукьда. Ам чи дамах я.
Мемориалдин кьул Элшадан буба Зафер Шагьвердиева ва муниципалитетдин кьилин заместитель Салигь Гьажимурадова ачухна. КIватI хьанвайбуру адан патав цуьквер эцигна.
Митингдал хуьруьн администрациядин кьил Замидин Мирзоевни рахана. Школада кIелзавай аялри ватандиз, игитриз бахшнавай шиирар кIелна. Элшадан диде-бубади кIватI хьанвайбуруз сагърай лагьана, са диде-бубани веледрикай магьрум тахьун, дуьнья ислягь, кьилел михьи цав хьун алхишна.
«Лезги газет»
