25 ва 26-январдиз  Агъа СтIалрин юкьван школада, “2023-йисан дидед чIалан лап хъсан муаллим” лишандик кваз, кьиле тухузвай республикадин конкурсдин муниципальный пай кьиле фена. Ана райондин школайра лезги чIалан ва литературадин тарсар гузвай 8 муаллимди иштиракна: Эльвира Тагьировади (Шихидхуьр), Мадина Ферзилаевади (Агъа СтIал), Нарима Балиевади (Герейханован хуьр), Эльза Гьажимурадовади (Асалдхуьр), Тамила Султанагьмедовади (Вини СтIал), Сефербег Мегьамедова (Цмур), Альберт Эмирбегова (Чуьхверхуьр), Девришбег Жабраилова (Птидхуьр). Муаллимдин пешекарвилин дережадиз ва алакьунриз 6 касдикай ибарат тир жюриди (Муминат Бабаханова, Назират Азимова, Гуьзел Межидова, Рамиз Идрисов, Регина Агьмедова, Зурият Султанагьмедова) къимет гана.

Нетижада 1-чкадиз (133 балл), Агъа СтIал­­рин СОШ-дин муаллим Мадина Ферзилаева лайихлу хьана. 2-чка (120 балл) Тамила Сул­танагьмедовади ва 3-чка (116 балл) Нарима Балиевади кьуна.

Конкурсда иштиракай ва тафаватлу хьайи муаллимриз райондин образованидин управленидин грамотаяр, Арбен Къардашан “Хкя­гъа­яр” ктабар, Агъа СтIалрин хуьруьн па­тай (кьи­ле Надир Эфендиев аваз) пулунин пишкешар гана.

21-февралдиз Кьасумхуьруьн И.Гь.Тагьи­рован тIварцIихъ галай культурадин дворецда кьиле фейи илимдинни тежрибадин конференциядал “2023-йисан дидед чIалан лап хъсан муаллим” Мадина Ферзилаевадив СтIал Сулейманан  райондин кьил Саид Темирханова чухсагъулдин чар вахкана.

Меценат Имам Яралиеван “Умуд” фонду­нин векил Савин Велиевани Мадина Ферзилаевадиз фондунин патай пулдин пишкеш гана.

“2023-йисан дидед чIалан лап хъсан муаллим” тIварцIиз лайихлу хьанвай Ферзилае­ва Мадина Шихзадаевна 1983-йисуз Агъа СтIалрин хуьре дидедиз хьана. Юкьван школа лап хъсан къиметралди акьал­тIа­рай ам 2000-йисуз Дербентдин педколледждик экечIна. Гьеле кIел­за­вай йисара Мадинади, жуьреба-жуьре конкурсра иштиракиз, вич гележегдин пешедал рикI алай студент яз къалурнай. 2003-йисуз колледж яру дипломдалди акьал­тIа­рай жегьил пешекар хайи хуьруьн школадиз дидед чIалан тарсар гуз хтана.

Вичин тарсара ада цIийи технологийрикай менфят къачузва. Адан аялар чIалан олимпиадайрин призерар, гъалибчияр я. Абуру флешмобра, конференцийра иштиракзава. “Лезги газетди” ва “Леки” фондуни районда кьиле тухвай чIа­лан олимпиадада адан ученица Замина Шихнебиевади 3-чка кьуна.

Разивилин келимаяр Мадина Шихзадаевнадин гьакъиндай РУО-дин ИМЦ-дин директор Муминат Бабахановади, ИМЦ-дин методист Назират Азимовади, дидед чIала­рин муаллимрин ассоциациядин регьбер Гуьзел Межидовади лагьана.

Мадина муаллимдин зегьметдиз школадин руководстводини къимет тагана тунвач. Ам са шумудра гьуьрметдин грамотайриз ла­йихлу хьана.

Чнани Мадина муаллимдиз агалкьун мубаракзава.

Асият Мирзалиева