Ватан хуьзвайбурун йикъан вилик СтIал Сулейманан районда, военный махсус серенжемдин ва Чечняда кьиле фейи женгерин иштиракчийрин тIварар эбеди рикIера хуьнин лишан яз, мемориалрин кьулар ачухна. Мярекатра военный ре­кьяй къуллугъчийрин багърийри, райондин кьил Саид Темирханова, адан заместителар тир Лацис Оружева ва Абуталиб Фатулаева, образованидин управленидин начальник Гьуьсейн Шихбабаева, муаллимри, школайра кIелза­вай аялри, общест­венностдин ва СМИ-рин векилри иштиракна. Мярекатар Россиядин Федерациядин Пайдах хкажунилай, Гимн тамамарунилай, кьегьалрин экуь къаматар, са декьикьада кисна акъвазуналди,  рикIел хкунилай башламишна…

И юкъуз Зизикрин хуьруьн юкьван школадиз Украинада кьиле физвай военный махсус серенжемда женгера игитвилелди телеф хьайи мотострелковый бригададин командир, махсус серенжемда иштиракиз гуьгьуьллудаказ фейи полковник Марат Гьажибалаеван тIвар гана.

— Къе чна лишанлу мярекат кьиле тухузва — школадиз Марат Гьажибалаеван — кьегьал командирдин, Россиядин халис ватанпересдин, игитдин тIвар гун яз, мемориалдин кьул ачухзава. Чи ватанэгьли вири уьлкведиз чизва. Адан женгинин агалкьунрал гьар са россиявиди дамахзава.

Маратан диде-бубадихъ элкъвена, абуру лайихлу гражданин, Ватан хуьдай кьегьал хва тербияламишунай рикIин сидкьидай тир чими келимаяр лугьуз кIанзава. Чун квехъ гала, вири куьмекар гуз чун гьамиша гьазур я. Чна квехъ галаз санал дерт чIуг­вазва. Къени къилихрин инсан тир куь хцин экуь къамат чи рикIера гьамиша амукьда. ЦIийи школади, аялрин бахча­ди­, хуьруьн  акьалтзавай несилри Марат Гьажибалаев вуж ятIа рикIелай ракъурдач. Да­гъус­тан­дин Кьил Сергей Меликова­н тапшуругъдалди мукьвара и объектар эци­гунив эгечIда, — къейдна райондин ­кьили.

Саид Мусиновича ва Маратан буба  Мугъул Гьемзебалаевича мемориалдин кьул ачухна. КIватI хьанвайбуру адан патав цуьквер эцигна.

Митингдал рахай школадин директор Маният Мегьамедовади, райсобранидин депутат, Маратахъ галаз са классда кIелай Даир Яралиева, Марат Гьажибалаеван бубади ва масабуру Маратан рикIе аял чIавалай военный хьунин мурад аваз хьайиди къейдна.  Школа акьалтIарай жегьил мурад кьилиз акъудун патал Москвадин высший военный командный училищедиз гьахьна. Анаг ва гуьгъуьнлай РФ-дин Яракьлу Къуватрин кьушунрин военный академия акьалтIарна. Буйнакскда ва Чечняда кьиле фейи вакъи­айра иштиракна, военный частара къуллугъна, кьилдин бригададин командирдин везифаяр тамамарна. Ам “Жуьрэтлувиляй” ва маса шабагьрин сагьиб тир (Ватандин вилик буржи тамамардайла, акьал­тIай кьегьалвални намуслувал къалурунай алай йисан январдиз С.Меликован Указдалди Марат Гьажибалаеваз кьейидалай кьулухъ “Дагъустан Республикадин ви­лик лайихлувилерай” орден гана).

2019-йисуз Марат отставкадиз экъечI­навай. Секиндиз вичин хизандихъ, багърийрихъ галаз яшамиш хьанайтIани жедай. Амма женгинин офицерди, тежрибалу насигьатчи яз, вич женгер кьиле физвай чкада хьун кьетIна, гуьгьуьллудаказ махсус серенжемда иштиракиз фена.

Марат пуд веледдин буба тир. Вилик гзаф крар квай. 13-мартдиз Маратан 46 йис тамам жедай.

* * *

Райадминистрациядин пресс-къуллугъди хабар гузвайвал, 22-февралдиз Кьасумхуьруьн 1-нумрадин юкьван школадин цлал, СВО-да телеф хьайи Мирзали Мирзалиеван тIвар эбеди авунин лишан яз, мемориалдин кьул алкIурна. Гила инал шко­ла акьалтIарай кьвед лагьай жегьилдин­ тIвар пайда хьанва. Алатай йисан зулуз школадин цлал военный рекьяй къуллугъчи Тимур Гьасанагъаеван тIвар эбеди авунин лишан — мемориалдин кьул ачухнай.

Мадни са митинг аялринни жаванрин спортдин 1-нумрадин школада кьиле фе­на. Ам халис ватанперес,  Украинада кьи­ле физвай махсус серенжемда игитвилелди телеф хьайи лейтенант Алаудин Бабаеван тIвар ДЮСШ-диз гунихъ галаз алакъалуди тир. Алатай йисуз ЦIийихуь­руьн школадин цлални адан ва СВО-да телеф хьайи мад са кьегьалдин — сержант Арсен Гьабибован экуь къаматриз талукь мемориалдин кьулар ачухнай. Гила инал пуд лагьай жегьилдин тIвар пайда хьана — Ватан хуьдайбурун йикъан вилик, 1995-йисуз Чечняда кьиле фейи вакъиайра телеф хьайи Вячеслав Набиеван экуь къамат рикIел хкунин лишан яз, анал мемориалдин кьул ачухна.

Саид Темирханова кьегьалдин диде-бубадиз ва адаз тарс гайи муаллимриз сагърай лагьана.

— Вячеслав Набиев телеф хьайидалай инихъ гзаф йисар алатнава. Заз чизва, адан багърийрин рикIера тIал ама ва ам садрани акъатдач. Чи буржи, алакьдай ви­ри серенжемар кьабулуналди, ­акьалтзавай несилди чи игитар, чпин чанарилайни гъил къачуна, четин вахтунда уьлкведин итижар хвейи, адан агьалийрин хатасузвал таъминарай кьегьалар ­ри­кIелай алуд тавуникай ибарат я, — къейд­на ада.

Рагнеда Рамалданова