Ватан хуьзвайбурун йикъан вилик Дербент райондин Белиж хуьруьн 1 ва 2-нумрайрин  юкьван школайра, Украинада кьиле физвай махсус серенжемда телеф хьайи хуьруьнвияр тир Артем Вердиеваз, Аббас Гьашимоваз, Алиюлла Нагъиеваз ва Альберт Сефероваз мемориалдин кьулар ачухуниз талукьарна, ясдин митинг кьиле фена.

Махсус серенжемда къалурай дирибашвиляй ефрейтор Артем Вердиев, майор Аббас­ Гьашимов, аскер Алиюлла Нагъиев ва сержант Альберт Сеферов (кьейидалай кьулухъ) “Жуьрэтлувиляй” орденралди къейдна.

Митингда игит аскеррин ва офицердин диде-бубайри, РД-дин Халкьдин Соб­ранидин депутат Асият Алиевади, Дербент райондин кьил Мавсум Рагьимова, райондин управленийрин ва отделрин руководителри, школайрин директорри, хуьруьн агьалийри ва школьникри иштиракна.

“Ихьтин магьрумвилер гьар сад дертлу ийидайбур я. Гьихьтин гафар лагьайтIани, ди­де-бубайриз абуру я сабур гудач, я рикIе­вай тIал кьезилардач. Игитри дуьньяда ислягь уьмуьр патал чпин жегьил­ чанар къурбандна. Женгера телеф хьайи викIегь рух­ва­яр­ халисан игитар я. Абур тербияламишай ди­де­-бубайриз чна кьил агъуз­на, икрамзава. Чун квехъ гала ва вири па­тари­хъай куьмекар гуз гьазур я”, — лагьана М. Рагьимова.

Мемориалдин кьулар Мавсум Рагьимова­, аскеррин диде-бубайри ва  багърийри ачухна­. М.Рагьимова аскеррин багърийриз, де­рин­дай хажалат чIугуналди, башсагълугъвал гана. Са декьикьада кисна акъвазайдалай гуьгъуьниз мемориалдин кьуларал цуькверин кIунчIар эцигна.

«Лезги газет»