РД-дин Гьукуматдин Председатель Абдулмуслим Абдулмуслимова Халкьдин Собранидин вилик авур докладда алатай йисуз республикадин здравоохраненидин хиле кьиле тухванвай кIвалахрин нетижаярни кьуна.
Адан гафарай малум хьайивал, 2022-йисуз “Модернизация первичного звена здравоохранения РД” программадин сергьятра аваз, региондин азарханайриз 91 улакьни медицинадин 379-дав агакьна жуьреба-жуьре алатар маса къачуна.
Идалайни гъейри, алатай йисуз республикада цIийи 3 ФАП-ни 1 амбулатория эцигна акьалтIарна. Медицинадин 56 идарадин дараматра цIийикIа туькIуьр хъувунин кIвалахар кьиле тухвана. А.Абдулмуслимова гьакIни къейд авурвал, алатай йисуз Дагъустанда санитариядин авиациядикай 176 сеферда менфят къачуна. Медицинадин рекьяй куьмекдихъ муьгьтеж 206 кас вертолетда аваз азарханайрив агакьарна. Абурукай 36 аялар тир. И макьсадриз 159 миллион манат пул чара авунвай.
Премьер-министрдин гафаралди, региондин здравоохраненидин хиле алай йисузни хейлин кIвалахар кьиле тухудайвал я.
«Лезги газет»
