2023-йисан 21-февралдиз, 68 йисан яшда аваз, Дагъустандин литературадин машгьур деятель, Халкьдин шаир, СССР-дин ва Россиядин писателрин Союздин член, Дагъустандин писателрин Союздин Председатель Мегьамед Агьмедович Агьмедов рагьметдиз фена.
Ам 1955-йисан 13-ноябрдиз Гуниб райондин Гонода хуьре дидедиз хьана. Гьеле школада амаз, ада шиирар кхьизвай. Хуьруьн юкьван школа акьалтIарайдалай кьулухъ ам М.Горькийдин тIварцIихъ галай Литературадин институтдиз гьахьна. Ана ада вичин тикрар тежер хьтин алакьунар къалурна, агитбригадайрик кваз чи уьлкведин гзаф регионра къекъвена.
Урусрин зурба шаир А.Блока кхьенай: “Шаирдихъ чIехи къуллугъар ваъ, чIехи кьисмет жеда”. Мегьамед Агьмедовичан кьисметни, шаирдин, критикдин, публицистдин хьиз, хайи Дагъустандихъ галаз алакъалу хьана, шаир патал Ватан руьгьдин акьалтI тийир чешмедиз, гзаф кьадар сюжетарни образар арадал гъунин бинедиз элкъвена.
Дагъустандин ктабрин чапханада кIвалахуни, адалай гуьгъуьниз, дегиш тахьана Дагъустандин писателрин Союздин Правленидин Председателдин къуллугъдал алаз, гзаф йисарин яратмишунринни общественный къуллугъди адан инсанвилин ва шаирвилин кьетIен яржарикай ибарат биография арадал гъана. Ам Ватандал ашукь гьакъикъи патриотдин чIехи рехъ фена, ада гафунин устаддин ва халкьдин вилик гьар са патахъай аннамишнавай жавабдарвал гьиссзавай.
Руьгьдин зурба лайихлувилерин алем хьайи бажарагълу инсан гзаф критикри чIехи Расул Гьамзатован шаирвилин алакьунрин ирс кьабулайди яз гьисабзавай. Гила ам чахъ галамач, амма адан михьи рикIин деринрай атанвай яратмишунар чав гума. Абуру вахтунихъ галаз сад хьиз эбеди яз ван ийида, несилрив инсанвилинни ватандашвилин чIехи ивирар агакьариз къуллугъда. Эхиримжи йисара шаирди хейлин цIийи эсерар чапдай акъудна. Абурун жергеда “Шаир”, “Сирлу сят”, “Шаир ва халкь” ва маса ктабар ава.
М.Агьмедова республикадин ва уьлкведин литературадинни общественный уьмуьрда активвилелди иштиракзавай. Ватанэгьлийрин арада ада чIехи гьуьрмет, авторитет къазанмишна.
Мегьамед Агьмедович Агьмедован экуь къамат дагъустанвийрин рикIера эбеди яз амукьда.
С.А.Меликов, З.А.Аскендеров, А.М.Абдулмуслимов, М.-С.Б.Мегьамедов, А.П.Гьасанов, Ю.А.Левицкий, Р.А.Алиев, М.Л.Мажонц, Н.М.Омаров, С.С.Агьмедов, К.М.Давдиев, Н.Ш.Абдулмуталибов, Р.Ж.Жафаров, А.М.Магьмудов, М.П.Телякавов, С.Д.Мирошкин, Р.К.Гъазимегьамедов, Р.Р.Гьуьсейнов.
* * *
“Лезги газетдин” редакциядин коллективди Дагъустандин Халкьдин шаир, Дагъустандин писателрин Союздин Правленидин Председатель Мегьамед Агьмедович Агьмедов рагьметдиз финихъ галаз алакъалу яз, адан хизандиз, мукьва-кьилийриз ва вири багърийриз башсагълугъвал гузва.
