16-февралдиз, Виридуьньядин милли чIаларин йикъан сергьятра аваз, Дербент райондин Араблинка хуьруьн юкьван мектебда эдебиятдин межлис тешкилнавай. Ам лезги ва азербайжан чIаларин муаллимар тир Зумрият Мегьамедшерифовадини Гьуьрият Султановади кьиле тухвана.
Мярекатда, теклифнавай мугьманрилай гъейри, мектебдин директор Тагьир Османова, и цIарарин авторди, чIехи классра кIелзавай аялри, муаллимри ва масабуру иштиракна.
Милли эдебиятдин межлисда ам кьиле тухузвайбуру лезгийрин ва азербайжанрин шаиррин яратмишунрикай итижлу суьгьбетар авуна. Гуьгъуьнлай мектебда кIелзавай аялри гагь лезги, гагь азербайжан чIаларал фасагьатдаказ шаиррин эсерар кIелна.
Мярекатда иштиракайбурун арада Белиж поселокдин мектебда лезги чIалан тарсар гузвай муаллим, шаир Гъулангерек Ибрагьимовани авай. Межлисдикай вичин фикирар лугьудайла, ада къейдна:
“Къе зун и мярекатда иштиракунал гзаф шад я. Дидедин чIал, хайи чIал. И гафара вири ава. ЧIал рикIелай алуддайдаз халкьди гьуьрметдач. Вучиз лагьайтIа, халкь чIал амай кьван сагъ я. ЧIал хуьн — им хайи халкь хуьн лагьай чIал я. Гьелбетда, тек са чIижревай вирт кIватIиз жедач, ам кIватIун патал чIижерин са луж герек я. Хайи чIал хуьнин рекьени чун сад хьана кIанда”, — къейдна ада ва Россиядин Игит Зейнудин Батмановаз бахшнавай вичин шиир кIелна.
Мярекатдикай вичин фикирар азербайжанрин шаир Максим Султановани лагьана.
Эхирдай Тагьир Османова шаирриз, викIегьдиз мярекатда иштиракай аялриз, гуьруьш хъсандиз тешкилна кьиле тухвай муаллимриз, вири иштиракчийриз сагърай лагьана.
Къагьриман Ибрагьимов
