Къанунсуз алвер
Дагъустандин МВД-дин пресс-къуллугъди хабар гузвайвал, УКОН-дин къуллугъчийри наркотикар (гашиш) хиритI авунай (маса гунай) шак фенвай 20 ва 23 йисарин яшара авай Махачкъаладин кьве агьали кьунва.
Ахтармишай вахтунда абурув гваз хьайи наркотикрин гъвечIи 8 багълама (санлай къачурла, 7 граммдин заланвал авай) винел акъатна. Шак фенвайбурун автомобиль ахтармишай вахтунда гьанайни гашиш кутунвай 35 багълама (32 граммдин заланвал авай) жагъана.
Гуьгъуьнлай ихтибарлувилелди ихтилатар авунин нетижада шак фенвайбуру Махачкъалада гашиш гьазурзавай чкани тайинарна. Кьунвайбуру ихтилатнавайвал, абуру метягь маса гун патал интернетдин сетда махсус аккаунт туькIуьрна. КIвал кирида къачуна, гьана гашиш хвена ва вахтуналди кирида къачунвай машиндин куьмекдалди наркотикар маса гана.
Тахсиркарвилин лишанриз килигна, шак фенвайбуруз талукь яз РФ-дин УК-дин 228.1-статьядай (наркотик квай затIар къанунсуздаказ маса къачун, хуьн ва маса гун) уголовный дело къарагъарнава. Къанунсуз алверди садазни хийир гъидач.
Шак фенвайди кьунва
Дагъустандин МВД-дин УУР-дин къуллугъчийри инсан кьинай шак фенвайди кьунва. Идакай РД-дин МВД-дин телеграм-каналди хабар гузва.
Къейдзавайвал, 15-февралдин нянрихъ полициядин дежурный частуниз Махачкъаладин С.Къулиеван куьчеда малум тушир касди Ахвах райондин 54 йисан яшда авай агьалидал чукIулдалди хирер авурдакай ва ам залан агьвалат кьиле фейи чкадал кьейидакай хабар агакьна.
РД-дин МВД-дин уголовный розыскдин къуллугъчийри шак физвайди тайинарнава, ам Табасаран райондин 41 йисан яшда авай агьали я.
Ада вич дустунин кIвале хьайидакай, чпи ички хъвайидакай ихтилатна. Геж хьиз абурун патав кьведазни таниш маса кас атана. КIвалин иеси хъвадай ички маса къахчун патал туьквендиз фейи макъамда мугьманрин арада къал акъатна. Шак фенвайдан гафаралди, муькуьда адал хенжел гваз гьужумна. Гьужумзавайдавай хенжел вахчуналди, гьадан руфун хенжелдалди са шумудра яна. Хирер хьайиди гуьгъуьнлай жугъундин а патаз гадар хъувуна.
И делилдай полициядин къуллугъчийри кIватIнавай материал силис тухун патал вахканва. Россиядин силисдин комитетдин РД-да авай силисдин управлениди РФ-дин УК-дин 105-статьядин 1-паюнай (инсан яна кьиникь) уголовный дело къарагъарнава.
ДТП-дин нетижада
17-февралдин экуьнахъ СтIал Сулейманан райондин мулкара (“Мамрач-Ташкапур-Аракан муьгъ”) рекьел “ВАЗ-111730” автомобиль гьалзавай 46 йисан яшда авай Мегьарамдхуьруьн райондин агьалиди вичин машин къаншардай улакьар къвезвай патаз акъудна ва ам Мегьарамдхуьруьн райондин 33 йисан яшда авай агьалиди гьалзавай “Mercedes-Benz GI 500” машинда акьуна. Идакай РД-дин МВД-дин пресс-къуллугъди хабар гана.
Авариядин нетижада “ВАЗ-111730” машинда авай пассажир (адан 61 йис тир) азарханадиз агакьарна. Амма, залан хирер себеб яз, къутармишдай мумкинвал хъхьанач. Суд-силис авун патал материал кIватIнава.
«Лезги газет»
