Чи ватанэгьлияр — гьар сана
Чи аямдин несилрин рикIелай Ватандин ЧIехи дяве, жуван тарих, меденият ва адетар рикIелай алатун мумкин кар туш. Фад алатай дяведин вакъиаяр чаз исятдани кинохроникадалди, ветеранрин суьгьбетралди, художественный фильмайралди ва дяведикай кхьенвай эдебиятдин эсерралди мукьва я. 1941-1945-йисар гьич рикIелай алатдайбур туш. Ватандин ЧIехи дяве ва ана жуьрэтлувилелди иштиракай, гъалибвални азадвал патал чанарилайни гъил къачур чи ата-бубаяр рикIел хкуналди, къенин аялриз ватанпересвилин, инсанпересвилин тербия гуз жеда, чи тарихдив, алатай девиррин вакъиайрив, Ватан хуьзвай аскеррив гьуьрметдивди эгечIун лазим тирди чирда. Алатай девирра Россиядин баркаллу рухвайрин игитвилерикай чирвилер авачиз, чи йикъарин жегьилриз тербия гуз хьун мумкин туш.
Заз РагъакIидай патан Сибирда — Ханты-Мансийский автономиядин округда — яшамиш жезвай чи ватанэгьли Лазир Казбекович Тагьировакай ихтилатиз кIанзава. Покачи шегьердай армиядин жергейриз эвер гайи ам алай вахтунда ХМАО-дин шегьердин жуьредин Пойковский поселокда яшамиш жезва. Ина яшамиш жезвай жегьилар патал ам хъсан чешне я.
Чи гъвечIи стха Лазир Тагьиров СтIал Сулейманан райондин Герейханован хуьре дидедиз хьана. Пойковский поселокда лезгийрин милли медениятдин автономиядин председатель яз, ада округдин ва райондин жемиятдин уьмуьрда активнидаказ иштиракзава. Лазир Тагьирова Покачи шегьерда лезги жемиятдин векилри тешкилзавай мярекатра са шумудра иштиракна.
Алай вахтунда Пойковский поселокдин ЛНКА-ди Донбассда ва Макеевкада мобилизациядин сергьятра аваз къуллугъзавай и поселокдин аскерриз гуманитарный куьмекар гузва.
Пойковский поселокда кьиле фейи мярекатра иштиракдайла, заз акуна хьи, Лазир Казбекович хъсан тешкилатчи я. Мярекатра жемиятрин кьиле акъвазнавай ксари, поселокдин милли медениятрин “Родники” центрадин директор Виктор Калинушкина ва масабуру иштиракзава.
Акьуллу, чешнелу, сейли ксарихъ галаз хъсан мярекатар тешкилунилай гъейри, Л.Тагьирова хайи хуьруьн мектебдизни спонсорвилин куьмекар ийизва.
Лазир Казбековича пуд хциз тербия гузва. Кавказдин, иллаки лезги халкьдин адетар рикIелай алудзавач. ХМАО-да жувахъ галаз ихьтин камаллу, чарадан дердиникай хабар кьадай жемиятдин деятель яшамиш хьунал за дамахзава.
Жалауддин Абдуразакьов,
ФЛНКА-дин Советдин член
