РД-дин образованидин ва илимдин министерстводи хабар гузвайвал, идарадин федеральный порталда “Хуьруьн муаллим” программада иштиракун патал арзаяр кьабулун давам жезва.
Министерстводин пресс-къуллугъди рикIел хкайвал, кIвалахун патал хуьрерин чкайриз хтай муаллимривай са сеферда ва санлай гузвай эвездин пул — 1 миллион манат (Дальний Востокдин регионда — 2 миллион манат) къачуз жеда. Анжах ам къачун патал кьилиз акъудун лазим тир шартI ава — хуьруьн мектебда ихьтин муаллимди, гьич тахьайтIа, 5 йисуз кIвалахун чарасуз я.
И карда иштиракун патал федеральный “Хуьруьн муаллим” программадин сайтда регистрация авун ва ана къалурнавай пешейрикай сад хкягъун лазим я. “Хуьруьн муаллим” программада иштиракиз нивай жеда? Агъадихъ галай истемишунриз жаваб гузвай муаллимривай:
— юкьван пешекар ва я виниз тир педобразование авайбурувай (бязи регионра программада иштиракдай ихтияр вуз акьалтIар тавунвайбурузни ава. Амма абуру, гьич тахьайтIа, 3 курс куьтягьун чарасуз я);
— пул къачузвай вахтунда 18 йисалай 55 йисал кьван яшда авайбурувай (яшдиз талукь истемишунар, регионрилай аслу яз, гьар жуьрединбур хьун мумкин я);
— гьар жуьре регионра гьар жуьре алава истемишунарни хьун мумкин я, абурузни жаваб гана кIанда. Программа гьар са регионда вичин законодательствода къалурнавай кьетIенвилер гьисаба кьуналди кьилиз акъудзава.
ГьакIни муаллимдал гьафтеда 18 сятдилай тIимил тушиз пар хьун лазим я. Ада чирвилер гузвай идарадихъ галаз 5 йисан муддатдалди икьрар кутIунда. Эгер и икьрардин шартIар кьилиз акъуд тавуртIа, къачунвай пул тамамдаказ вахкун лазим жеда (бязи дуьшуьшар квачиз — абурукай официальный сайтда кхьенва).
“Хуьруьн муаллим” программада иштиракун патал арзаяр 2023-йисан 22-майдалди кьабулда. Республикадин муаллимривай документар Дагъустандин образование еримлу авунин институтдив агакьариз жеда: Махачкъала шегьер, Мегьамедтагьирован куьче, 159 лагьай дарамат.
Хуьрерин муаллимар патал программада иштиракунин шартIариз талукь тамам вири делилар (гьихьтин пешейрин иесийривай иштиракиз жеда, гьихьтин документар лазим я ва икI мад), гьакIни документар кьабулзавай пешекаррихъ галаз алакъа жедай делилар федеральный “Хуьруьн муаллим” порталдай жагъида.
«Лезги газет»
