Мукьвара чав, дидед чIалан муаллимрив­, шад хабар агакьна: 2022-йисуз С.Б. Юз­бе­говадин редакциядик кваз  “Лезги-урус гафарган” чапдай  акъуднава.И  гафаргандикай чавай, дидед чIалан тарсар гузвай муаллимри­вай, менфят къачуз жеда. Гафарган Россиядин илимдин академиядин Дагъустандин ахтармишунрин федеральный центрадин Гь.ЦIадасадин тIварцIихъ галай чIа­лан, эдебиятдин ва медениятдин институтдин илимдин советдин къарардалди  акъуднава.

И ктабдин важиблувиликай, адан къиметлувиликай рахадайла, къейд ийиз, фикир желб ийиз кIанзавай са шумуд тереф ава. ИкI, сифтени-сифте заз адан винел патан аку­нар гуьрчег тирди къейд ийиз кIанзава. Кьвед лагьайди, и ктабда чаз бегьем таниш тушир гафа­риз жуьреба-жуьре баянар ганва; гафаргандик мягькем ва азад ибараяр, фразеологиядин оборотар, хци келимаяр, мисалар, мис­кIалар, мана ачухарзавай келимаяр кутунва.

“Лезги-урус гафарган” ктабда къанни цIуд агъзурдав агакьна лезги эдебиятдин чIалай ва нугъатрай къачунвай гафар ава. Абурун жергеда чеб гзаф ишлемишзавай яша­йиш­динни экономикадин, илимдинни техникадин, чIалан, эдебиятдин ва медениятдин терминарни ава.

Гафаргандин эхирдай лезги чIалан грамматикадикай очерк, дуьньядинни Дагъустандин географиядиз талукь чкайрин тIварар ва жуьреба-жуьре алаваяр ганва.

Гафаргандикай кIелзавай­бу­рун гегьенш къатаривай, лезги ва урус чIаларин муаллимривай, шко­лайра ва вузра кIелзавай­бу­рувай, таржумачийривай, лезги ва урус чIаларай чирвал хкажунин мурад авайбурувай менфят къачуз жеда.

М.Жаруллаева,

Ярагъ-Къазмайрин мектебдин дидед чIалан муаллим