Республикадин “Хуьруьн виридалайни хъсан муаллим” конкурсдин эхиримжи паюна (ам Первомайскдин С.Багомаеван тIварцIихъ галай гимназияда кьиле фена) гъалиб хьана: Первомайскдин гимназиядин биологиядин муаллим Фатима Мегьамедова (Къаякент район) ва Терекли-Мектебдин А.Жанибегован тIварцIихъ галай школадин сифтегьан классрин муаллим Гуьльнара Хозбулатова (Ногъай район). Идакай ДИРО-дин инфоррмациядин къуллугъди хабар гузва.
Финалда хуьрерин мектебрай тир 12 муаллимди иштиракна Абуру чпин пешедай бажарагъ мастер-классар ва тарсар кьиле тухуналди раижна. Адетдин технологийрихъ галаз санал бязи муаллимри, тарсар гудайла, чпи туькIуьрнавай, яни авторвилин къайдаярни ишлемишна.
Кьвед лагьай чкадиз Испикрин СОШ-дин урус чIалан ва литературадин муаллим Регина Агьмедова (СтIал Сулейманан район) ва Белиждин М.Ярагъвидин тIварцIихъ галай 1-нумрадин мектебдин информатикадин муаллим Сабрина Султанова (Дербент район) лайихлу хьана.
Пуд лагьай чка Вини Женгутайдин СОШ-дин урус чIалан ва литературадин муаллим Сайгибат Межидовади (Буйнакский район) ва Агвалидин К.Абакарован тIварцIихъ галай гимназиядин химиядинни физикадин муаллим Шамил Исаева (ЦIумада район) кьуна.
«Лезги газет»
