Алатай йисуз Россиядин Яшайишдин фондуни (СФР) инвалидвилиз талукь тир яшайишдин ва страховой пенсияр (ихтилат физвайди виликан йисара пенсионерар тушир ксарикай я) 297 агъзур агьалидиз тайинарна. Вири и такьатар инвалидрин Федеральный сад тир реестриз къвезвай делилрин бинедаллаз, яни азарлу касдин арза галачиз (проактивно) тайинарнавайбур я. СФР-дин Дагъустанда авай Отделенидин пресс-къуллугъди хабар гузвайвал, чи республикада пенсияр и жуьреда 10 агъзурдалай виниз агьалийриз тайинарнава…
Малум хьайивал, арза галачиз агьалидиз пенсия тайинарунин къарар Яшайишдин фондуни МСЭ-дин (медико-социальный экспертизадин) бюродин делилрал бинеламиш хьуналди тайинарзава. ИкI, МСЭ-дин органди инвалидвал тайинарнавайвилин гьакъиндай малумат инвалидрин сад тир реестрдиз рекье твазва. Идалай гуьгъуьниз Яшайишдин фондуни кIвалахдин 5 йикъан вахтунда пенсия тайинарзава. Агьалидиз и кардикай малумат “Госкъуллугъар” порталдин хсуси кабинетдиз ва я почтадай рекье твазва.
Инвалиддив пенсия виликдай Яшайишдин фондуни тайинарнавай маса такьатар гузвай къайдада агакьарзава. Эгер виликдай и рекьяй са жуьрединни пулар къачунвачтIа, агьалиди вичи пул къачудай къайда “Госкъуллугъар” порталдин хсуси кабинетда, я тахьайтIа, Яшайишдин фондунин муьштерийрихъ галаз кIвалахдай къуллугъда, гьакIни МФЦ-да къалурун лазим я. И кар закондалди къалурнавай векилдин куьмекдалдини кьилиз акъудиз жеда.
Проактивный къайдада, яни агьалидин патай арза галачиз, пенсийрилай гъейри, Яшайишдин фондуни инвалидвал авай агьалийриз пенсиядин кьадардин гьахъ-гьисаб цIийикIа кьазва ва абуруз яшайишдин пособияр тайинарзава. Кьилди къачуртIа, иник гьар вацра гудай пособие ва яшайишдин къуллугъар акатзава. Эхиримжибурук лагьайтIа, дарманралди ва медицинадин тадаракралди таъминарун, санаторийриз путёвкаяр гун, шегьеррин арада электричкайрикай пулсуздаказ менфят къачун ква.
КьетIендаказ къейд ийин хьи, винидихъ лагьанвай жуьреда, яни агьалидин патай арза галачиз, инвалидвилин пенсия анжах ам (инвалидвал) виликан йисара авачир агьалийриз тайинарзава. Эгер виликан йисара пенсия къачузвай касдиз инвалидвилин пенсия тайинарзаватIа, виликдай къачузвайдал алава яз гьар вацра гудай такьатар вич-вичелай эля хъжеда. Ватандин ЧIехи дяведин иштиракчияр, “Блокададин Ленинграддин агьали” лишан ганвай, гьакIни армияда хьайи хер-кьацI себеб яз инвалидар хьанвай ксариз федеральный законодательстводи гьа са вахтунда кьве пенсия (инвалидвилиз килигна — гьукуматди ва яшариз килигна — страховой) къачудай ихтияр гузва.
РикIел хкин: Яшайишдин фондунин муьштерийрихъ галаз кIвалахдай къуллугъар — ибур виликан Пенсийрин фондунин шегьерра ва районра кардик квай идараяр я. Чи республикада абур 51 ава. Гьаниз килигна, агьалийривай, чпиз виликдай таниш адресдиз фена, я тахьайтIа, кIваляй къецел экъечI тавуна, “Госкъуллугъар” порталда агьалидин хсуси кабинетда лазим месэла гьялиз жеда.
Рагнеда Рамалданова
