Са тIимил йикъар идалай вилик Ирандин меркез Тегеран шегьерда азаддаказ кьуршахар кьунай дуьньядин клубрин арада Кубокдин чемпионат кьиле фена. Дагъустандин кьуршахар кьунай спортдин федерацияди хабар гузвайвал, ана Ирандин, Эрменистандин, Гуржистандин, Индиядин, Къазахстандин, гьакIни сад лагьай сефер яз Россиядин командайри иштиракна. Малум хьайивал, чи уьлкведин команда январдиз Красноярскда кьиле фейи Ярыгинан турнирдин гъалибчийрикай ва финалистрикай ибарат тир. ИкI, чи машгьур ватанэгьли Шамил Мамедован лайихлу пайни кваз, командади и чемпионатда къизилдин медаль къазанмишна, Россиядин команда 2-чкадиз лайихлу хьана…
Къейд. Кесерлу и акъажунар исламдин республикади VI сеферда кьабулна. Анжах са сеферда ам Украинадин Харьковда кьиле фенай.
Къизгъиндаказ кьиле фейи акъажунра Россиядин командадиз Индиядин ва Эрменистандин командаяр кьведни 9:1 гьисабралди кумукьна, финалда чи ватандашриз Ирандин командадихъ галаз “гуьруьш” кьисмет хьана. Саки вири йисара (анжах 2016-йисуз и акъажунра Америкадин “Титан Меркюри” клуб гъалиб хьанай) Кубокдин сагьиб хьайи Ирандин командадиз лагьайтIа, Гуржистандин команда — 10:1 ва Къазахстандин команда 9:1 гьисабралди кумукьнавай.
Кубадин финал гьам кьилди спортсменар ва гьам кьилди командаяр патал мадни къизгъинди, тамашачияр патални лап итижлуди хьана. Ана Россиядин ва Ирандин “азадбурун” пуд жуьт сад-садал гьалтнавай: 57-кг-дал къведалди заланвал авайбурун арада — Рамиз Гьамзатов — Агьмад Мохаммаднеджад; 61 кг-дал къведалди заланвал авайбурун арада — Муслим Мегьтиханов — Реза Атри; 65 кг-дал къведалди заланвал авайбурун арада — Шамил Мамедов — Мохаммед Рамезанпур.
Шамил Мамедова и чемпионатда нубатдин сеферда вичин устадвал ва алакьунар вини дережада къалурна. Ада гьасиррал вири пуд бягьсни инанмишвилелди гъалибвал къазанмишуналди акьалтIарна.
Регина Семедова
