Украинада миллетчийрихъ галаз тухузвай махсус серенжемда Мегьарамдхуьруьн райондин Бут-Къазмайрин хуьряй алай вахтунда 86 касди иштиракзава. Кьуд кьегьалди Ватан патал чпин чанар къурбандна. Ингье абур: Шагьмарданов Самур Омаран хва, Мегьамедов Малик Халикьан хва, Жафаров Мегьамед Жаферан хва ва Ширинов Артур Къудратан хва.
Шагьмарданов Самур 1998-йисуз дидедиз хьана. Адан буба Омар хуьруьн спортдин мектебда дзюдодай тренер, диде кIвалин кайвани я. Самура юкьван мектеб акьалтIарна. КIелдай чIавуз ада вич хъсан спортсмен тирди акъажунра успатна. 2016-йисуз адаз армиядин жергейриз эверна. Тула шегьердин ВДВ-дин кьушунра къуллугъна. Самура спортдин рекьяй устадвилин тIвар къачуна. Ам спортдин рекьяй пара шабагьрин сагьиб хьана. Украинада кьиле тухузвай махсус серенжемдиз гуьгьуьллудаказ фена. Хизан кутун кьисмет тахьай жегьил 2022-йисан 28-апрелдиз кьегьалвилелди телеф хьана. Кьейидалай кьулухъ “Жуьрэтлувиляй” орден гана. Райондин кьил Агьмедов Фарида орден буба Омарав вахкана.
Мегьамедов Малик 1990-йисан 26-октябрдиз Афгъандин дяведин иштиракчи, дяведин ветеран Мегьамедов Халикьан хизанда дидедиз хьана. Диде Светлана кIвалин кайвани я. 2008-йисуз Малика Бут-Къазмайрин мектеб хъсан къиметар аваз акьалтIарна. Гьа йисуз Благовещенск шегьердин военный институтдик экечIна. 2012-йисуз лейтенантди Россиядин Яракьлу Къуватра къуллугъиз гатIунна. Ахпа адакай 394-полкунин командир хьана, капитандин чин къачуна. Баркаллувилелди къуллугъзавай офицер Суворован, “Аскервилин жуьрэтлувиляй”, “Къуллугъда тафаватлу хьунай”, “Женгинин дуствал мягькемарунай” медалрин сагьиб тир.
2022-йисан мартдин сифте йикъарилай эгечIна, Украинада кьиле тухузвай махсус серенжемда 16-мартдалди иштиракна. Телеф хьайидалай гуьгъуьниз адазни “Жуьрэтлувиляй” орден гана. Ам адан диде Светланадив вахкана.
Жафаров Мегьамед 1974-йисуз Ахцегь райондин Мацарин хуьре дидедиз хьана. 2010-йисалай Россиядин къенепатан крарин министерствода къуллугъна. Херсондин областдин Давыдов Брод хуьруьн къваларив душманди артиллериядай цIай гузвай макъамда, женгинин юлдашар хатасуз чкадив агакьардайла, залан хирер хьайи ам санбатдиз хутахзавай рекье куьтягь хьана. Кьейидалай кьулухъ адаз “Жуьрэтлувиляй” орден гана.
Ширинов Артур 1990-йисан 26-июндиз Бут-Къазмайрин хуьре дидедиз хьана. 2007-йисуз ам Дагпединститутдик экечIна. 2010-йисан 10-декабрдиз адаз аскервилиз эверна. 2012-йисан апрелдилай ада икьрардин бинедаллаз РФ-дин Яракьлу Къуватра къуллугъзавай, Чечен Республикадин Урус-Мартанда авай частуна. 2018-йисуз ЧР-дин ФСБ-дин начальник В.В.Якобчука чухсагъул малумарна ва ам “Къуллугъда тафаватлувиляй” III дережадин медалдиз лайихлу хьана. Украинада кьиле тухузвай махсус серенжемда сифте йикъарилай иштиракна. 2022-йисан 3-октябрдиз женгина телеф хьана. Кьейидалай кьулухъ адаз “Жуьрэтлувиляй” орден гана.
Ватандин итижар патал чанар гайи вири рухвайриз рагьмет хьурай!..
Мукаил Агьмедов
