Махсус серенжемдикай

Севастополдин патай Госдумадин депутат Д. Белика “Новости” РИА чешмедиз малумарнавайвал, эгер Киевдив РагъакIидай патай яргъал мензилдиз ядай ракетаяр агакьайтIа, Украина мад маса мулкарикайни магьрум жеда.

Адан фикирдалди, ядерный яракьар ишлемишунин жигьетдай тапан икьраррал Россияди амал авуниз талукь РагъакIидай патан уьлквейрин буш хиялар барбатI хьанва.

РФ-дин Президент Владимир Путина, Федеральный Собранидиз  Чар  раиждайла, малумарна хьи, США-ди ядерный яракь­рин цIийи жуьреяр туькIуьрзава ва ядерный яракьар ишле­ми­шунин мумкинвилерикай фикирзава. Идахъ галаз алакъалу яз, эгер США-ди и кар сифте кьилиз акъудайтIа, В.Путина РФ-дин­ оборонадин министерстводал ва “Росатомдал” Россиядин ядерный яракьар синагъ авуниз гьазурвал акун тапшурмишнава.­

Депутатдин гафаралди, РагъакIидай пата Украинадиз 100 километрдин мензилдив агакьдай ракетаяр ракъурайтIа, адан мулкар 150 километрдин тIимил жеда.

21-февралдиз РФ-дин оборонадин министерстводи малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 386 самолет ва 210    вертолет, зенитный ракетайрин 405 комплекс, пилот галачиз лув гудай 3203 аппарат, 7960 танк ва дяведин маса машинар, РСЗО-дин 1037 машин, артиллериядин ва маса 4171 яракь, военный махсус 8472 автомашин тергна.

Россияни Китай икьрар хьанва

Россияни Китай дуьньядин многополярный къайда арадал гъуниз куьмек гуз гьазур я ва са терефдихъай гузвай гьар гьихьтин­ хьайитIани къурхуйриз саналди аксивал ийида. Ихьтин фикир Ки­тайдин Компартиядин ЦК-дин къецепатан крарин рекьяй комиссиядин канцеляриядин регьбер Ван Идинни РФ-дин Сов­без­дин секретарь Николай Патрушеван арада Москвада кьиле фейи гуьруьшдин нетижайриз талукь яз Китайдин МИД-ди малумарна.­

Къейдзавайвал, гуьруьшдин вахтунда кьве уьлкве гзаф терефрин форматра алакъалувилелди кIвалахар давамарунин ва глобальный гьалар идара авунин кар хъсанарун патал мадни гзаф къуватар эцигунин икьрардал атана. Россиядини Китайди Азиатско-Тихоокеанский регионда ислягьвал ва пайгарвал хьун патал санал кьетIивилелди тереф хуьнин чарасузвални кьетIен­даказ къейдна.

Гуьруьшдин вахтунда Ван Иди Россиядинни Китайдин арада­ авай рафтарвилер “раг хьиз мягькембур” тирди лагьана. Адан га­­фаралди, дуьньядин гьалар дегиш хьунихъ галаз алакъалу им­тигьанриз Россиядинни Китайдин алакъайривай дурум гуз жеда.

Гьахъ винел акъатна кIанзавач

ООН-дин Хатасузвилин Советдин заседанидал РФ-дин векил В. Небензяди малумарайвал, РагъакIидай пата “Северный поток” газопровод хъиткьинарунихъ галаз алакъалу агьвалат гьахълудаказ ахтармишуниз итиж ийизвач. Адан фикир “Новости” РИА-ди раижнава.

В.Небензядин гафаралди, газдин турба хъиткьинарунихъ галаз алакъалу делил ахтармишун патал комиссия арадал гъуниз талукь яз Россияди теклифай проектдин къарар кьабулай тегьерди успатзава хьи, РагъакIидай патаз и ахтармишунрик кьил кутаз кIанзавач. “Гьелбетда, и карди чи шаклувилер мадни артухарзава”, — лагьана дипломатди.

Къейд ийин, “Северный поток” газдин турбаяр алатай йисан 2-сентябрдиз хъиткьиннай. 2023-йисан 8-февралдиз Америкадин­ журналист С.Херша и нагьакьан крарик США къаришмиш я лагьан­вай макъала чапна. Адан фикирдалди, хъиткьинарунин се­рен­жем США-дин ВМС-ди (Военно-морские силы) кьилиз акъудна.

Мад залзалаяр

Ислендиз Туьркиядин Хатай вилаятда ва Сирияда мад сеферда залзалаяр хъхьуникди 700-лай гзаф ксариз хасаратвилер хьана. Абурукай 18 касдин сагъламвал четин гьалда ава. “Новости” РИА-ди хабар гузвайвал, идакай 22-февралдиз Туьркиядин МВД-дин кьил Сулейман Сойлуди ихтилатна.

20-февралдиз Хатайда сифтедай 6,4 магнитудадин ва пуд декьикьадилай 5,8 магнитудадин залзалаяр хьана. ТIебии завалрин судурар арадай акъудунин управлениди хабар гайивал, кьве залзаладин нетижада 6 кас кьена.

Туьркияда идалай вилик (6-февралдиз) хьайи залзалайрин нетижада кьейибурун кьадар, 21-февралдин делилралди, 42 агъзурдалай алатнава.

СВО акьалтIунин шартI

Эгер США-ди Украинадиз яракьар ракъурунин кардал эхир эцигайтIа, дяве куьтягь жеда. Ихьтин шартI Россиядин Хатасузвилин Советдин председателдин заместитель Дмитрий Медведева вичин телеграм-каналда малумарна.

Ада алава хъувурвал, эгер “Россияди, гъалибвал къачун та­­вунмаз, СВО акъвазарайтIа, Россия амукьдач, ам пайи-па­ярда”­.

Гьазурайди — К.Ферзалиев