Мегьарамдхуьруьн райондин администрациядин векилар РФ-дин Росгвардиядин кьетIен къуллугъдин 40-дестедин Украинада кьиле тухузвай военный махсус серенжемдин иштиракчийрихъ галаз гуьруьшмиш хьана. Мярекатдин сергьятра аваз махсус серенжемда аскервилин буржи тамамардайла телеф хьайибурун диде-бубайрив краповый беретар вахкана.
Винидихъ тIвар кьунвай кьетIен къуллугъдин дестедин командир Руслан Примова райондай махсус серенжемда иштиракзавай вири кьегьалриз баркалла лагьана. Гьа са вахтунда Украинадин миллетбазрихъ галаз женг чIугвазвай аскерриз жуьреба-жуьре куьмекар гунай, абурун хизанрин гьакъиндай къайгъударвал авунай администрациядин векилриз сагърай лагьана.
Краповый беретар женгера телеф хьайи младший сержант — Рашидов Рамизан, жергедин аскер — Муслимов Дасиман диде-бубайрив вахкана.
Къизгъин женгера викIегьвилелди иштиракзавай ва чпин буржи тамамарзавай кьетIен къуллугъдин дестедин командир Руслан Примов, старший лейтенант Асхаб Асхабов, сержант Къадирбег Къазиагьмедов гьуьрметдин грамотайралди къейдна.
«Лезги газет»
