3-февралдиз Дербент шегьердин Женгинин баркаллувилин музейда “Дагъустандин халкьарин культура ва адетар” программадин сергьятра аваз Мансур Куьревидин “Етим Эмин” ктабдин презентация хьана. Мярекат тешкилайбур Женгинин баркаллувилин музей ва Дербентдин педколледж я.
Ана, кьиле Гуьльпери Мирзабалаева аваз, музейдин работникрилай гъейри, шегьердин школайра дидед чIалан тарсар гузвай муаллимри, шаирар тир Сардар Абила, Гъулангерек Ибрагьимовади, Зейнаб Султанагьмедовади, Лезгийрин С.Сулейманан тIварцIихъ галай госмуздрамтеатрдай Дагъустан Республикадин лайихлу артистка Эльмира Къарахановади, и цIарарин авторди, музыкадин училищедин студент Леонида, педколледждин студентри ва шегьердин 15,18-нумрайрин школайра кIелзавай аялри иштиракна.
Мярекат Женгинин баркаллувилин музейдин директор Алик Кьасумова ачухна. Етим Эминан ирсинин кьетIенвиликай вичин фикирар мярекат кьиле тухузвай педколледждин лезги чIаланни литературадин муаллим Рагнета Алиевади раижна. Етим Эминан девлетлу ирс, уьмуьрдин рехъ къенин юкъузни ахтармишна куьтягьнавач. И рекье цIийи камар ери-бине Вини Ярагъай тир лезги хва, алим, общественный деятель, таржумачи, физикадинни математикадин илимрин кандидат, Москвадин физико-технический институтдин радиотехникадин кафедрадин старший преподаватель Низами Абдулгьамидович Абдулгьамидова къачузва.
Мансур Куьревиди акъуднавай ктаб кIелайла, якъин жезва хьи, ада ам анжах Эминан девирдин документрал, делилрал бинеламиш хьана кхьенва.
Мярекатдал Етим Эминан яратмишунрикай, цIийи ктабдикай чпин фикирар Сардар Абила, Гъулангерек Ибрагьимовади, Лезги театрдин литотделдин заведующий Эминат Заирбеговади, ракьун рекьерин музейдин руководитель Гьажиагъа Мегьамедшерифова лагьана. Рахайбуру Мансур Куьревидин ктабда, шииррал бинеламиш хьана, Етим Эминан биографияда хтунвай цIийи дегишвилер, эхиримжи йисара гьат хъувунвай гьеле малум тушир са бязи делилар ачух хьанвайди къейдна. Авторди ахтармишунрин зурба кIвалах тухванва. Ам еке шабагьдиз лайихлу я.
Къагьриман Ибрагьимов
