14-февралдиз Дагъустандин Кьил Сергей Меликова Украинада кьиле физвай махсус серенжемда телеф хьайи дагъустанвийрин мукьва-кьилийрихъ галаз нубатдин гуьруьш кьиле тухвана. Идакай “Лезги газетдиз” РД-дин Кьилин пресс-къуллугъди хабар гана.Мярекатдин вилик
Сергей Меликова ва вири иштиракчийри телеф хьанвайбурун экуь къаматар рикIел хкана.
“Сифте нубатда заз квез виридаз, дериндай хажалат чIугунивди, башсагълугъвал гуз кIанзава. Чна квехъ галаз санал куь чIехи дерт пайзава. Гьа са вахтунда чна кьатIузва: эгер чи мукьвабур, ватанэгьлияр, стхаяр Ватандин сенгерар хуьз къарагъначиртIа, телефвилер мадни пара жедай”, — лагьана Сергей Меликова.
Дагъустандин Кьили республикадин гьукумдин органри Ватан хуьзвайбурун хизанриз вири рекьерай куьмекар гун давамардайди къейдна. “Четин гьар са декьикьада чун квехъ гала ва квевай чак умуд кутаз жеда”, — алава хъувуна ада.
Украинада кьиле физвай махсус серенжемда телеф хьанвайбурун хизанриз федеральный ва региондин дережада аваз гузвай куьмекрикай гегьеншдиз РД-дин зегьметдин ва яшайишдин рекьяй вилик финин министр Мурад Къазиевани республикадин военный комиссар Дайтбег Мустафаева ихтилатна.
Эхирдай Сергей Меликова иштиракчийрин тIалабунрихъ яб акална ва абуру къарагъарай месэлаяр гьялун патал талукь идарайриз тапшуругъар гана.
Агьмед Магьмудов
