11-февралдиз Махачкъалада, РД-дин милли сиясатдин ва динрин крарин рекьяй министерствода, “Кьиблепатан Дагъустандин жегьилрин Союз” тешкилатдин заседание кьиле фена. Ам анин регьбер, ОНФ-дин Кьилин штабдин къуллугъчи Равидин Абдурагьимова тухвана.
“Кьиблепатан Дагъустандин жегьилрин союз” 2016-йисуз арадал гъана. Адан асул везифаяр жегьилриз ватанпересвилин тербия гунихъ, Кьиблепатан Дагъустандин халкьарин милли ирс хуьнихъ, образование, илим, спорт, туризм вилик тухунихъ, сагълам уьмуьр таблигъат авунихъ галаз алакъалу я. Къейд ийин хьи, Союздик лезги чIалан хизандик квай халкьарин векилар кутунва: лезгийрин, табасаранрин, агъулрин, рутулрин, цIахуррин, арчийрин, будухрин, кърызрин, удинрин ва хиналугърин.
Союздин асул кIвалах 6 комитетдин арада пайнава ва абурун гьакъиндай жавабдар ксарни (комитетрин регьберар) тайинарнава. Тешкилатдик квай жегьилрин чIехи пай Дагъустандин ва уьлкведин маса регионрин вузра кIелзавай студентарни аспирантар я, абурун кьадар 300-дав агакьзава.
7 йисан къене Союзди са жерге мярекатар кьиле тухванва. Виридакай рахун тавуртIани, абурукай бязибур къейд авуниз лайихлу я. Махачкъалада жемиятдинни сиясатдин машгьур деятель Мамед Абасован куьмекдалди Кьиблепатан Дагъустандай тир студентрин слет кьве сеферда тешкилна. Мярекатдин сергьятра аваз хъсандиз кIелзавай студентриз дипломар, пулунин пишкешар ва маса савкьатар гана. “Кьиблепатан Дагъустандин ирс” лишандик кваз лезги чIалан хизандик акатзавай халкьарин чIаларалди шиирар кIелунай тухвай конкурс лишанлудаз элкъвена. “Хайи чIаларал аудио-ктабар” тешкилатдин кар алай проектрикай сад я. Адан автор лезги чIалал акъатзавай “Кард” журналдин редактор Марина Ибрагьимова я. Проектдин сергьятра аваз къенин юкъуз лезги, табасаран, рутул, агъул чIаларал 60-далай виниз эсерар аудио-форматдиз элкъуьрнава. Милли меденият хуьнин рекьяй кардик квай “Киногодекан” проектдин сергьятра аваз жемиятдин гегьенш къатариз Советрин девирда дагъвийрин яшайишдикай гьазурнавай кинояр къалурзава. Къейд ийин хьи, и проект СКФО-дин яшайишдин рекьяй тухвай са фестивалда гъалиб хьана.
Заседанидал Равидин Абдурагьимова Союзди кьиле тухванвай кIвалахрикай ва алай вахтунда вилик акъвазнавай месэлайрикай ихтилатна. ГьакIни мярекатдин сергьятра аваз тешкилатдин къаюмвилин совет арадал гъана. Аник меценат Мамед Абасов (председатель), Ставрополдин думадин депутат Казбек Агъаларов, СтIал Сулейманан райондин кьилин заместитель Заур Къагьриманов, РД-дин Халкьдин Собранидин депутат хьайи Тимур Гусаев, машгьур журналист Руслан Къурбанов, МЧС-дин подполковник Шамил Алиев, «Лезги газетдин» кьилин редактор Мегьамед Ибрагьимов, Махачкъаладин 42-нумрадин юкьван мектебдин директор Тимур Саркаров, жемиятдин векил Мегьамед Алиев, Дербентдин Женгинин баркаллувилин музейдин къуллугъчи Гуьлпери Мирзебалаева, РД-дин Общественный палатадин член Вагьаб Къазибегов ва цIахуррин милли автономиядин регьбер Рафаэль Алиев ква.
Заседанидин иштиракчийри чпин рахунра Кьиблепатан Дагъустандин халкьарин милли ирс хуьнин карда авай важиблувал къейдна, бязи теклифар гана.
Мегьамед Ибрагьимов
