И йикъара, Дагъустандин образованидин ва илимдин министерстводин къаюмвилик кваз, республикадин алава образованидин центради Дагъустандин халкьдин майи­шатдин институтда алакьунар авай аялриз куьмек гузвай «Альтаир-2023-Кьуьд. Илим» смена тухвана. Ана Дербент райондин школайра хъсандиз кIелзавай, олимпиадайра обществознанидай, химиядай, праводай ва биологиядай кIвенкIвечи чкаяр кьур, чIехи класс­рин 12 аялди иштиракна.

Курсарин кьилин макьсад кIел­завайбуруз олимпиадайра ва конкурсра хкянавай гьар жуьредин тарсарай теориядинни тежрибадин вердишвилер гуз гьазурвал акун я.

Мярекат бажарагъ авайбур вилик тухудай “Альтаир” центрадин деректордин везифаяр тамамарзавай Аймесей Дибировади ачухна.

Олимпиададиз гьазур хьунин рекьяй ругуд юкъуз давам хьайи тарсара аялри обществознанидин, химиядин, праводин ва биологиядин хилерай хейлин цIийи чирвилер къачуна ва виниз тир нетижаярни къалурна.

Райондин кьиблепатай ана Белиж по­селокдин 4-нумрадин юкьван школадин­         11-класс­да кIелзавай  Хамза  Абдулкеримова  иштиракна. Ина къалурай дерин чирвилерай ам дипломдиз ва сертификатдиз ла­йихлу хьана.­

— Хамза Абдулкеримова, 9,10 ва гила 11-классра кIелдайла географиядай, ОБЖ-дай, праводай олимпиадайра иштиракна, гьамиша садлагьай чкаяр кьуна, гилани кьазва, — лагьана школадин директор Радик Апаева. — Ада гьакIни школадин же­миятдин уьмуьрдани, спортдин мярекатрани активнидаказ иштирак­зава.

Алай кIелунин йисуз праводай олимпиададин муниципальный паюна сад лагьай чка кьунвай Хамзади республикадин олимпиадада иш­тиракуниз гьазурвал аквазва.

Къагьриман Ибрагьимов