С.Керимова Докъузпара райондиз 100 миллион манат пул чара ийида
Саласа юкъуз Докъузпара райондин кьил Мегьамед Шамилованни машгьур меценат, РФ-дин Федерациядин Советдин сенатор Сулейман Керимован арада гуьруьш кьиле фена. Идакай “Лезги газетдиз” муниципалитетдин администрациядин пресс-къуллугъди хабар гана.
Гуьруьшдин вахтунда абуру Докъузпара район яшайишдинни экономикадин жигьетай вилик тухуниз талукь месэлаяр веревирдна, муниципалитетдихъ авай мумкинвилерикай рахана. М.Шамилова С.Керимоваз яшайишдин программаяр кьилиз акъудзавай гьаларикай, район вилик тухунин жигьетдай авай фикиррикай ва кIвалахда гьалтзавай четинвилерикай хабар гана.
Райондин кьилин рахунрихъ яб акалайдалай кьулухъ С.Керимова вич алай вахтунда муниципалитетдин вилик акъвазнавай кар алай месэлаяр гьялун патал 100 миллион манат чара ийиз гьазур тирдакай лагьана.
Садазни сир туш, эхиримжи йисара Сулейман Керимова Дагъустандиз жуьреба-жуьре рекьерай куьмекар гузва, республика яшайишдинни экономикадин жигьетдай вилик финик еке пай кутазва. И сеферда куьмек адан хайи райондивни агакьда.
“Зи стхади чи уьлкве, республика патал ийизвай крарихъ еке метлеб, адаз Дагъустанда ва адалай къецепатани еке гьуьрмет ава, ам Урусатдин, хайи республикадин кьисметдихъ рикI кузвай халис ватанперес яз гьисабзава. Чи райондиз, республикадиз, санлай вири уьлкведиз куьмекар гунай, райондин кьил яз, за тухузвай кIвалахрин пад кьунай Сулейман Абусаидовичаз сагърай лугьузва”, — къейдна М.Шамилова.
(Къейд ийин хьи, Сулейман Керимовни райондин кьил Мегьамед Шамилов мукьва-кьилияр я).
Агьмед Магьмудов
