Дагъустанда мектебрин дараматар цIийикIа туькIуьр хъувунин жигьетдай кьиле тухудай кIвалахрал гуьзчивалдай махсус штаб арадал гъанва. Идакай 7-февралдиз Махачкъалада РД-дин Гьукуматдин Председатель Абдулмуслим Абдулмуслимован регьбервилик кваз кьиле фейи совещанидал РД-дин образованидин ва илимдин министр Яхья Бучаева хабар гана.
Къейд ийин хьи, цIи республикадин 36 муниципалитетдин 139 мектебда ремонтдин кIвалахар тешкилда. И макьсадриз 3,6 миллиард манат пул ахъайдайвал я. И кьадардикай 1 миллиард манатдихъ аялриз чирвилер гунин карда герек къвезвай алай аямдин техникани мектебриз герек маса тадаракар къачуда. РикIел хкин, алатай йисуз Дагъларин уьлкведа 191 мектебда цIийикIа туькIуьр хъувунин кIвалахар кьиле тухванай. Абуруз 4,4 миллиард манат пул харжна.
Винидихъ тIвар кьур штабдик РД-дин аялрин ихтияррин рекьяй векил Марина Ежова, жемиятдин тешкилатрин, РД-дин Общественный палатадин, жегьилрин парламентдин векиларни студентар акатнава.
«Лезги газет»
