Вири пешеяр хъсан я,
Хкягъа жуваз кIаниди!.. — кхьенай вичин девирда машгьур шаир Владимир Маяковскийди.
И келимайрин мана куьгьне хьанвач. Виликдайни жегьилри, гьеле мектебда амаз, гележегдин пешейрикай фикирзавайди тир. КIани, алакьдай пеше къачуз алахъзавай. Къенин жегьилрини и кардал, гьелбетда, амалзава.
Вичикай ихтилат физвай духтур-терапевт, 1969-йисуз Кьасумхуьрел Раизанни Насиратан хизанда дидедиз хьайи Жасминани гьахьтинбурун жергедик акатзава. Ада лап хъсандиз кIелна. Муаллимри ам гьамиша чешне яз къалурдай. Школада амаз руша гзаф ктабар кIелзавай, вичин чирвилер артухарзавай. 1986-йисуз Жасминади Кьасумхуьруьн 1-нумрадин мектеб къизилдин медаль къачуналди куьтягьна. Ада яргъалди фикирнач, лазим тир документар гьазурунин къайгъуйрик хьана, Дагъустандин мединститут хкяна. И кардин себебни Ленинграддай тир медицинадин илимрин доктор, профессор Углован ктаб кIелун хьана. Имтигьанрин вахтунда Жасминадиз, къизилдин медаль авайди гьисаба кьуна, кьабулзавай комиссияди 4-дакай анжах са имтигьан — биологиядай вахкудай ихтияр гана. Имтигьанни руша “вад” къачуналди вахкана. Виниз тир къимет гунилай гъейри, кьабулзавай комиссияди адаз чухсагъулни лагьанай. Гьа икI, Жасминадикай мединститутдин (гила медакадемия) лечебный факультетдин студентка хьана. Тарсарив гатIунай сифте йикъалай кIелна куьтягьдалди ам лекцийрив, семинаррив, илимдинни тежрибадин рекьяй чирвилер къачунивни рикIивай эгечIна. Ада профессор Углован адрес жагъурна, адахъ галаз алакъа хвена. КIелай ктаб себеб яз вичикай мединститутдин студент хьайиди лагьана. Адани Жасминадиз, тIвар кхьена, вичин ктаб рахкурна. Ам ада исятдани кIвале хуьзва…
Студентвилин йисар алатна. 1992-йисуз Жасмина Раизовна — мединститут вадралди акьалтIарнавай жегьил руш Киевдиз ракъурзава. Ина ада 1992-1994-йисара терапиядин пешекарвиляй интернатурада кIелунар давамарзава. КIелна куьтягьна, ам хуьруьз хквезва. Адаз ЦРБ-да бактериолог яз кIвалах гузва.
Вичин мураддив агакьнавай жегьилдин мехъерарни жезва и макъамда. Кьисметди Жасмина Раизовна Сийидрин хуьруьз акъудна. Рагьимханова Жасмина участокдин духтур-терапевтвиле тайинарзава. Ам регьят тушир, амма рикI алай кеспидин гъавурда мадни дериндай гьатзава. КIвалахдив анжах михьивилелди эгечIзавай адан тIвар виридаз раиж хьанва. Патарив гвай хуьрерин агьалиярни, кефсуз хьайила, Жасминадин суракьда жезва. Алай вахтунда Жасмина Раизовна Курхуьруьн амбулаториядин участокдин духтур — терапевтни я. Ада гьа и, Сийидар, Алкьвадар ва Сардар хуьрерин агьалийриз къуллугъзава. КIвалахдив, жавабдар везифайрив ам рикI гваз эгечIнава. Исятда гриппдикай, ковиддин чIуру таъсирдикай сагъардай серенжемар кьабулзава, агьалияр гъавурдик кутазва.
Жасмина — бахтлу хизандин диде, уьмуьрдин юлдаш Замир — бизнесмен, гада Теймур Воронежда — программист, руш Амина Махачкъалада стоматолог я. Марата районда казначействодин начальникдин заместителвиле кIвалахзава.
Кьилин категориядин терапевт Жасмина Раизовна ЦРБ-да совещанийрал, конференцийрал, “пятиминуткайрал” кIвалахдикай, цIийи везифайрикай рахазва, тежриба раижзава, гьакI медицинадин Махачкъалада кьиле тухузвай серенжемрани иштиракзава. Сагъвал хьурай вахъ, Жасмина!
Райсудин Набиев,
РФ-дин журналистрин Союздин член
