Мукьвара Белиж поселокдин Ярагъ Мегьамедан тIварунихъ галай 1-нумрадин юкьван мектебда лезги чIалал Дагъустандин авторрин эсерар хъсандиз кIелунай 11-классра кIелзавай­бу­рун арада республикадин конкурсдин муниципалитетдин пай кьиле фена.

Мярекатда Дербент райондин администрациядин образованидин управленидин дидед чIа­ла­рай методист Мерзият Рамазановади, РД-дин писателрин Союздин лезги секциядин регьбер Владик Батманова, Да­гъус­тандин лайихлу муаллим, шаир Гъулангерек Ибрагьимовади, Белиждин аялрин яратмишунрин кIвалин директор, РД-дин ис­кусствойрин лайихлу деятель Маме­дали Агъабалаева, ашукь Къаира, и цIарарин авторди,  мек­тебрин директорри, лезги чIа­лан муаллимри, кьуьлердай “Кавха” ансамблдин регьбер Сефербег Сефербегова ва масабуру иштиракна.

Мугьманар ва конкурсдин иштиракчияр мектебдин директор Имара Заловади кьабулна. Ада кIватI хьанвайбуруз мярекат тебрикна ва конкурсда иштиракзавай аялрихъ алакьунар къалурдай зигьинни устадвал хьун алхишна.

Иштиракчийри Етим Эминан, Абдуселим Исмаилован, Шагь-Эмир Мурадован, Абдулкъадир Сайдумован, Гъулангерек Ибрагьимовадин, Владик Батманован, Абдул Фетягьан ва маса авторрин чIалакай, лезги чиликай, кьегьалрикай, Ватандикай кхьенвай эсерар кIелна.

Жюридин членри рейсадвилелди 1-чка Белиждин 4-нумрадин школада кIелзавай Кевсер Абдулкеримовадиз  гана.

Амай чкаяр икI пай хьана: 2 — чкаяр — Фатима  Къазиагьмедова (Белиждин 1-нумрадин мек­теб), Алия  Магьсудова (Агълабрин мектеб), Эльзана Магьмудова (Хазардин мектеб). 3-чкаяр — Камил Идрисов (Бе­лиждин 2-нумрадин мектеб) ва Саид  Мегьамедагъаев (ЛукIа­рин мектеб).

Къейд ийин хьи, Кевсер Абдулкеримовади Махачкъалада кьиле фидай республикадин конкурсда иштиракда.

Къагьриман Ибрагьимов