Алай йис Мегьарамдхуьруьн райондин юбилейдинди я. Ватандин ЧIехи дяведин лап къизгъин 1943-йисуз тешкилай ада Дагъустан вири рекьерай вилик финик вири девирра лайихлу пай кутаз хьана ва исятдани кутазва. Къе Мегьарамдхуьруьн район республикада виридалайни чIехи, девлетлу районрикай сад я.  Баркаллу юбилей ина кутугай гьалда, метлеблудаказ къейдни авун кьетIнава.

И мукьвара райондин кьил Фарид Агьмедован регьбервилик кваз юбилейдиз талукь серенжемар гьазурунин ва кьиле тухунин рекьяй тешкиллувилин комитетдин заседанидал а серенжемар веревирдна. Фикирда кьунвайвал, лишанлу вакъиа гегьеншдиз, чIехи метлеб аваз, руьгь ку­тадай гьалара къейдда. Юбилейдин лишандик кваз хуьрер авадан ийида, рекьер, куьче­яр, майданар, гьаятар туь­кIуьр­да­, яшайишдин метлеб авай объ­ектар цIийи­кIа туькIуьр хъийи­да.

Заседанидал райондин тарихда чIехи роль къугъвай, ам машгьур авур, вилик тухуник ла­йихлу пай кутур районэгьлияр гьамишалугъ рикIел хуьниз, Украинада тухузвай военный махсус серенжемда кьегьалвилелди телеф хьайи аскерриз гуьмбетар эцигуниз талукь месэлайризни килигна. Муниципалитетдин тарихдикай, инсанрикай, абурун баркаллу крарикай ктаб, буклетар, суварин савкьатар, ядигарар гьазурда. Йисан вахтунда гьар са хуьре, зегьметчи коллективра, мектебра 80 йисан юбилейдин лишандик кваз жуьреба-жуьре мярекатар кьиле фида.

Чи мухбир