И йикъара Махачкъалада, Даггоспедуниверситетдин спортдин дворецда, армрестлингдай кьиле фейи Дагъустандин чемпионатда республикадин жуьреба-жуьре пипIерай тир 100-лай виниз спортсменри заланвилин 10 категориядай чпин гъилерин къуватлувал къалурна. Абурун арадай тир чи ватанэгьлийри — Мегьамедвели Халикьова (110 кг-дин заланвиляй) ва Эрзиман Алисултанова (70 кг-дин заланвал авайбурун арада) чемпионвилин тIварар къазанмишна, нубатдин сеферда чеб къуватлу гъилерин сагьибар тирди субутна…
РикIел хкин: М.Халикьован ери-бине Къизляр райондин Сарсар хуьряй я. Гила ада Дагъустандин чемпионвилин тIвар 11-сеферда къазанмишнава. Мегьамедвели спортдин и жуьредай Вирироссиядин ва республикадин хейлин турниррин гъалибчи, армрестлингдай спортдин мастер, боксдай спортдин мастервиле кандидат я. Росгвардиядин Дагъустан Республикада авай Управленидин кьилдин батальондин къуллугъчи, полициядин сержант Мегьамедвели Халикьова нубатдин гъалибвал, военный рекьяй къуллугъдин везифаяр ва Ватандин вилик буржи кьилиз акъуддайла, телеф хьайи ксариз бахшзава.
Э.Алисултанован ери-бине СтIал Сулейманан райондин ЦIийи Макьарилай тирди, ада тренер, машгьур спортсмен, дуьньядин чемпион Малик Тагьирбегован гъилик устадвал хкажайди, агалкьунар адахъ идалай виликни хьайиди чаз чизва. Чи пландик мукьвара кьве ватанэгьлидихъ галазни суьгьбет кьиле тухун ква.
Р. Рамалданова
