Алай йисан 19-июндиз Ахцегь райондин администрацияда терроризмдиз акси комиссиядин нубатдин заседание кьиле фена. Ам “Ахцегь район” МР-дин кьил, АТК-дин председатель Осман Абдулкеримова кьиле тухвана.
Мярекатда РД-дин Кьилин куьмекчи, РД-дин АТК-дин векил З.Шайдабегова, Ахцегь райондин прокурордин заместитель Т.Мегьамедова, райондин имамрин советдин председатель А.Абдулгьашумова иштиракна.
Заседанидал агъадихъ галай месэлайриз килигна: “Лезги халкьдин игитвилин “Шарвили” эпосдин сувариз гьазур жезвай ва ам кьиле тухузвай вахтунда райондин мулкунал общественный хатасузвал ва къайда-низам таъминарун патал кьабулзавай алава серенжемрин гьакъиндай”, “Россиядин Федерацияда 2013-2018-йисара терроризмдин идеологиядиз акси комплексный пландихъ галаз алакъалу серенжемар Ахцегь районда уьмуьрдиз кечирмишунин ва гьа и пландин сергьятра аваз образованидин къурулушда, жегьилрин, паталай кIвалахиз атанвай мигрантрин арада профилактикадин кIвалах тухунин гьакъиндай”.
Винидихъ къейд авунвай месэлайрин ва тухузвай кIвалахдин гьакъиндай заседанидал “Ахцегь район” МР-дин кьилин заместителар А.Шуаева, Р.Гьамзаева, райондин къайдаяр хуьдай отделдин начальникдин везифаяр тамамарзавай А.Демирова, образованидин управленидин начальник А.Гьажиева, спортдин, жегьилрин ва туризмдин рекьяй отделдин кьилин пешекар Н.Исмаиловади малуматар гана.
“Ахцегь район” МР-дин кьил О.Абдулкеримова райондин администрациядин жавабдар къуллугъчийрал, хуьрерин администрацийрин кьилерал, къайдаяр хуьдай органрин руководителрал герек вири серенжемар кьабулун тапшурмишна. Ада райондин диндин векилрихъ галаз санал кIвалахуналди, райондин мулкунал диндин ва политикадин экстремизмдин гьерекатрин вилик пад кьадай мярекатар кьиле тухуниз эвер гана.
Хийир Эмиров
