И йикъара Кьасумхуьрел, алишверишдин “Терсепул” центрадин патав РД-дин “Дагпечать” ГАУ-дин киоск эцигнава. Гила Сулейман-Стальский райондин агьалийривай “Лезги газет” ва чпин рикI алай маса изданияр почтадин отделенийрилай гъейри, киоскдайни кхьиз жеда.
Лагьана кIанда, эхиримжи вахтара “Лезги газетдин” редакциядиз мукьвал-мукьвал, чпив газетар вахтунда ахгакьзавач лугьуз, почтадин отделенийрай газет кхьенвайбуру наразивилин зенгер ийизва. И месэладин патахъай чна Дагъустандин почтадин Управленидиз хабар ганва ва талукь серенжемар кьабулун тIалабнава.
Къейд ийин хьи, “Дагпечать” ГАУ-дин киоскрай подписчикрив газетар вахтунда ахгакьзава. Идалайни гъейри, почтадин отделенийрилай тафаватлу яз, киоскдай газетар, журналар подписка авунин къиметни ужуз я. И делилар фикирда кьуна, “Лезги газетдин” редакциядин руководстводи “Дагпечать” ГАУ-дихъ галаз Лезгистандин районра киоскар кардик кутунин жигьетдай рахунар кьиле тухванва. Гьелелиг Сулейман-Стальский районда са киоск эцигнава. Эгер киоскрай газетар, журналар подписка ийидайбурун кьадар пара хьайитIа, къведай йисуз абур Белиж поселокда, Мегьарамдхуьруьн, Ахцегь районра эцигдай фикирар ава.
Агъадихъ чна Сулейман-Стальский районда авай киоскдай алай йисан 2-пай патал подписка ийиз жезвай изданийрин сиягь гузва.
“Лезги газет” — (киоскдай — 220 манат, почтадин отделенидай — 410 манатни 10 кепек);
“Дагестанская правда” — (киоскдай — 576 манат, почтадин отделенидай — 1308 манат);
“Молодежь Дагестана” — (киоскдай — 180 манат, почтадин отделенидай — 439 манат);
“Анжи спорт” — (киоскдай — 1205 манат);
“Российская газета” — (киоскдай — 775 манат);
“ЗОЖ” — (киоскдай — 215 манат);
“Комсомольская правда” — (киоскдай — 642 манат);
“Дагъустандин дишегьли” — (киоскдай — 126 манат, почтадин отделенидай — 145 манат);
“Самур” — (киоскдай — 147 манат, почтадин отделенидай — 186 манат);
“Кард” — (киоскдай — 105 манат, почтадин отделенидай — 145 манат).
Киоскдай подписка ийизвай газетарни журналар кIвализ ахгакьарзавач, абур киоскдай вахчуна кIанзава. Винидихъ къалурнавай изданийрилай гъейри, “Дагпечать” ГАУ-дин киоскдай центральный маса изданиярни кхьиз жезва.
Агьмед Магьмудов
