Лезгистанда ихьтин мярекат тешкил хъувун тавуна гзаф йисар тир. 19-июндиз Кьасумхуьрел Махачкъала, Дербент шегьеррай, Рутул, Агъул, Ахцегь, Докъузпара, Хив, Мегьарамдхуьруьн, Табасаран, Дербент, Кьурагь районрай пара мугьманар атанвай. И юкъуз ина, медениятдин И.Тагьирован тIварунихъ галай маканда, Кьиблепатан Дагъустандин халкьарин чIаларал акъатзавай газетар кIелзавайбур республикадин СМИ-рин кьилин редакторрихъ галаз гуьруьшмиш хьана. Мярекатда вахтуналди РД-дин печатдин ва информациядин министрдин везифаяр тамамарзавай Рашид Акавова, Сулейман-Стальский райондин кьил Нариман Абдулмуталибова, Дагъустандин журналистрин Союздин председатель Али Камалова, “Лезги газетдин” кьилин редактор Мегьамед Ибрагьимова, “Дагъустан” ГТРК-дин ва РГВК-дин регьберри Луиза Алихановади, Елена Тагьировади, “Табасарандин нурар”, “Нур”, “Самурдин сес”, “Эренлардин сес”, “Рутулрин хабарар”, “Дагъдин булах”, “ЦIийи дуьнья”, “Агъулрин хабарар”, “Куьредин хабарар”, “Дербентдин хабарар” газетрин кьилин редакторри Гуьлагьмед Маллалиева, Байрам Абдуллаева, Абдул Исмаилова, Алибуба Эмирсултанова, Байрамбег Мегьамедова, Алван Рамазановади, Дашдемир Шерифалиева, Омар Мирзоева, Асият Мирзалиевади, Наида Къасимовади, “Куьредин ярар” журналдин редактор Агьмедпаша Агьмедпашаева, Сулейман-Стальский райондин мектебрин директорри, муаллимри, мухбирри, кIелзавайбуру иштиракна.
Мугьманар тебрикуналди гуьруьш Нариман Абдулмуталибова ачухна. Вичин рахунра райондин кьили лезги чIалал акъатзавай са жерге изданийрин агалкьунрикайни нукьсанрикай, республикадин телеканалрин кIвалахдикай, соцсетра мукьвал-мукьвал гьакъикъатдихъ галаз ерли кьан тийизвай, къалп хабарар чукIуруникай, бязи дуьшуьшра ихьтин крариз государстводин изданийрини рехъ гузвайдакай лагьана.
— Милли чIаларал акъатзавай газетрихъ еке важиблувал ава, — къейдна Н.Абдулмуталибова. — Хайи чIалар хуьнин, вилик тухунин жигьетдай абуру ийизвай кIвалах чIехиди я. Гьукуматди милли прессадиз гузвай куьмек мадни артухарна кIанда. И кардилай адан кьисмет, гележег аслу я…
Н.Абдулмуталибова “Лезги газетдин” жигьетдайни бязи фикирар раижна. Ада эхиримжи вахтара газетдин ери, кIалуб хъсан патахъ дегиш хьанвайдакай лагьана. Гьа са вахтунда алимди газетда чапзавай официальный макъалайрин чIал залан жезвайди, кIелзавайбур четиндиз гъавурда акьазвайди, яргъи макъалаяр — тIимил, куьруь, амма манадиз метлеблубур гзаф гана кIанзавайди, газетдиз акъатзавай вири макъалаяр хсуси сайтдани эцигун лазим тирди къейдна…
Вичин рахунрин эхирдай Сулейман-Стальский райондин кьили РД-дин печатдин ва информациядин министерстводиз и мярекат тешкилунай чухсагъул малумарна.
Милли чIаларал акъатзавай газетар кIелзавайбурухъ галаз кьиле тухузвай гуьруьшдин кьилин макьсадрикай Рашид Акавова ихтилатна. Адан гафарай малум хьайивал, гуьруьшдин асул метлеб кIелзавайбурухъ гьихьтин теклифар, игьтияжар, итижар аватIа чируникай ибарат я.
“Къе Кьасумхуьрел республикадин са жерге изданийрин кьилин редакторар атанва. Абуруз газетрин дережа хкажунин жигьетдай квехъ гьихьтин теклифар аватIа чириз кIанзава. За квевай активнидаказ иштиракун, суалар гун, хабарар кьун тIалабзава”, — лагьана министрди залдихъ элкъвена.
Рашид Акавова иштиракчийрин фикир Интернетдин мумкинвилерал желбна. — Интернетдай жуьреба-жуьре хабарар кIелзавайбурун кьадар къвердавай артух жезва, — лагьана ада. — Гьафтеда садра акъатзавай газетдилай тафаватлу яз, Интернетда таза хабарар гзаф жезва. Гьавиляй алай девирдин несилри и рекьиз артух итиж ийизва. Шад жедай кар ам я хьи, милли чIаларал акъатзавай хейлин газетри сайтар арадал гъанва, абур сетдин изданияр хьиз регистрация авунва. Интернетдин маса ресурсрихъ галаз санал “Лезги газет”, “Табасарандин нурар” газетрин сайтрин хабарарни “Яндексдиз” акъатзава. Им милли прессадин агалкьун я…
Газет итижлуди авун патал кIелзавайбурухъ галаз хуьзвай алакъа мягькемарна кIанда… Абурун игьтияжар фикирда кьуна, гьар са редакторди редакциядин сиясат арадал гъун герек я. И вахтунда газетрин тиражарни артух жеда, — алава хъувуна Р.Акавова.
Машгьур общественный деятель, медицинадин илимрин кандидат, “Лезги газетдин” вафалу амадаг Нариман Рамазанова хайи чIаларал “гьужумар” ийизвай вахтунда ихьтин гуьруьш кьиле тухун кутугай кар хьанвайди къейдна. Ада и йикъара Госдумада Россиядин милли СМИ-риз гузвай фикир артухаруниз талукь месэлаяр веревирд авунвайди рикIел гъуналди, уьлкведа хайи чIаларал акъатзавай изданийрин гележег хъсанди жедайдак умуд кутуна. Вичин рахунра Н.Рамазанова Россиядин почтади зайифдиз кIвалахзавайди, подписка ийизвайбурув газетар вахтунда агакь тийизвайди лагьана. Ада республикадин печатдин ва информациядин министерстводин руководстводивай и месэладиз кьетIен фикир гун тIалабна.
Бажарагълу писатель, Шихидхуьруьн мектебдин муаллим Нажмудин Шихнабиева “Лезги газетдин” тираж артух хьун хуьрерин мухбиррин макъалайриз газетдин чинрал гзаф чка, критикадин макъалайриз гьукумдин къурулушри вахтунда ва лазим дережада фикир гунилай, районра хайи чIалал акъатзавай газетдин жигьетдай таблигъат тухудай кIватIалар тешкилунилай пара аслу тирди лагьана.
“Лезги газетдин” штатдик квачир мухбир Райсудин Набиева мярекатдин иштиракчийриз 2018-йисан 2-пай патал хайи чIалал акъатзавай газетар кхьиниз эвер гана ва милли прессадин гьакъиндай вичихъ авай фикирарни раижна.
Милли изданийри хайи чIалар хуьнин, акьалтзавай несилар тербияламишунин карда къугъвазвай ролдикай, редакцийра авай месэлайрикай Али Камалова, Мегьамед Ибрагьимова, шаир Сажидин Саидгьасанова, Гуьлагьмед Маллалиева, Байрам Абдуллаева, муаллим Гьажимегьамед Гьажимегьамедова ва масабуру лагьана.
Гуьруьшдин сергьятра аваз Сулейман-Стальский райондин кьил Нариман Абдулмуталибовав РД-дин журналистрин Союздин, “Лезги газетдин” редакциядин, генерал-полковник Мегьамед Танкаеван тIварунихъ галай фондунин патай гьуьрметдин грамотаяр вахкана. И фондунин председатель, общественник, хейлин йисара республикадин Гьукуматдин органра кIвалахай Гьасангьуьсейн Абдулжелилова са жерге газетрин редакцийриз гьуьрметдин грамотаяр ва “Лезги газетдихъ” галаз хейлин йисара сих алакъаяр хуьзвай Рутул райондин Хъуьлуьдрин хуьряй тир Саидагьмед Абдурашидовазни шаир Сажидин Саидгьасановаз “Бурж ва намус” орденар гана.
Милли прессада бегьерлудаказ кIвалахзавай ва республикадин изданийрихъ галаз алакъаяр хуьзвай са жерге мухбиррин зегьмет гьуьрметдин грамотаяр гуналди РД-дин печатдин ва информациядин министерстводини “Лезги газетдин” редакцияди къейдна.
Лагьана кIанда, кIелзавайбу-рухъ галаз ихьтин гуьруьшар мукьвара Махачкъалада, Ботлих, Къизляр районрани кьиле тухуда.
Агьмед Магьмудов
