Дагъустанда 7 миллион манатдилай виниз бюджетдин такьатар чуьнуьхунай 38 мек­тебдин  директорризни  РД-дин  образованидин ва илимдин министерстводин са жерге къуллугъчийриз талукь яз къанун-къайда хуьдай органрин векилри ахтармишунар кьиле ту­хузва.

Республикадин прокуратурадин пресс-къуллугъди хабар гайивал, бюджетдин пулар меме­кьуьртI авунай, РФ-дин Уголовный кодексдин 159-статьядин 4-паюнал (“Лутувал”) асаслу яз, уголовный дело къарагъарнава.

Силисдин мярекатар кьиле тухудайла тайин­ хьайивал, 2022-йисан июль-август варцара 38 мектебдин директорри, винидихъ тIвар кьур ми­нис­терстводин векилрин иштираквал аваз, гуя гьар йисуз гузвай отпускриз тефинай хганвай эвездин пулар я лагьана, къанунсуздаказ 7 миллион манатдилай виниз бюджетдин пулар чуьнуьхна. Ихтилат гьи районрикай физватIа, проку­ра­ту­радин пресс-къуллугъди гьелелиг раижнавач.

Къейд ийин хьи, алай вахтунда уголовный делодин сергьятра аваз силисдин мярекатар давам жезва.

А. Магьмудов