Махсус серенжемдикай

РФ-дин оборонадин министерстводи 30-январдиз малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 381 самолет ва 205  вертолет, зенитный ракетайрин 402 комплекс, пилот галачиз лув гудай 2982 аппарат, 7679 танк ва дяведин маса машинар, РСЗО-дин 997 машин, артиллериядин ва маса 3962 яракь, военный махсус 8226 автомашин тергна.

Сих алакъаяр

Россиядини Китайди вири дережайра сих алакъаяр хуьзва. Идакай КНР-дин МИД-дин векил Мао Нина брифингдин вахтунда ихтилатна, хабар гузва “Новости” РИА-ди.

Идалай вилик РФ-дин къецепатан крарин министерстводи малумарайвал, и йисан гатфариз Си Цзиньпин Москвадиз атун Россиядинни Китайдин арада авай алакъаяр мадни мягькем жедай вакъиадиз элкъведа.

НАТО себеб яз

Франциядин “Патриоты” гьерекатдин регьбер, сиясатчи Ф.Филипподи, НАТО-дин стратегия себеб яз, дуьньядин пуд лагьай дяведик цIай акатун мумкин яз гьисабзава. Сиясатчиди соцсетда кхьенвай гафар “Новости” РИА-ди раижна.

“Китайди официальный къайдада США-дивай Украинадиз яракьар ракъурунал эхир эцигун истемишзава”, — лагьанва ада. Къейдзавайвал, гьалар къизгъинбуруз элкъуьн мумкин я.

И йикъара КНР-дин МИД-дин векил М.Нина Украинадин кри­зис­дик кьил кутунвайди США тирди тестикьарнай. Адан гафарал­ди­, эгер США-ди гьакъикъатдани Украинадин халкьарин гьакъин­дай къай­гъударвал ийизватIа, аниз яракьар ракъурун акъвазарна кIанда.

Россиядин гьукумдарри са шумуд сеферда тагькимарнай хьи, РагъакIидай пата Украина яракьралди ацIуруникди кьве терефдин арада меслятдин рахунар кьиле финихъ агалкьунар жедач ва и гьерекатри татугай гьалар арадал гъида.

Фикир сад туш

Европадин уьлквейрихъ Украинадин къалмакъалдин жигьет­дай США-диз кIанзавай хьтин рейсад фикир авач. Идан гьакъин­дай Донбасс хуьзвайбурун жергейра Франциядай тир гуьгьуьллу­бур­ хьуни шагьидвалзава. “Новости” РИА-ди хабар гузвайвал, ихьтин фикир РФ-дин къецепатан разведкадин къуллугъдин директор С.Нарышкина малумарна.

Фад ракъурун хиве кьунва

Норвегияди Украинадиз немсери акъуднавай “Leopard 2” танкар жезмай кьван фад ракъурун кьетIнава. Идакай “Новости” РИА-ди хабар гузва.

И танкар Норвегияди мартдин эхирра ракъурун мумкин яз, гьисабзава. Норвегиядихъ “Leopard 2” 36 танк ава, амма Украинадиз гузвай танкарин кьадар гьелелиг малумарнавач.

Германиядин гьукумдарри, сад лагьай этап яз, “Leopard 2” 14  танкуникай ибарат рота Украинадиз ракъурун фикирдиз къачунва.

РФ-дин МИД-дин кьил С.Лаврова идалай вилик малумарнай хьи, Украинадиз ракъурзавай гьар са яракь чи уьлкведин Яракьлу­ Къу­ватар патал тергдай къанунлу макьсаддиз, лишандиз элкъведа­.

Ноутбукар ужуз хьанва

И йикъара “Известия” газетди хабар гайивал, Рос­сия­да алатай зулалай инихъ ноутбукрин къимет 15-30 про­центдин ужуз хьанва.

“Новости” РИА-диз пешекарди ганвай делилралди, Россияда­ ноутбукрин къиметар агъуз аватун са жерге себебрихъ галаз ала­к­ъалу я. Кьилди къа­чуртIа, дуьньяда ноутбукар маса къачуз­вай­бурун кьадар тIи­мил хьанва. Идалайни гъейри, пешекардин фикирдалди, Россиядилай ужуз къиметрай тир уьлквейрин къушаба импортди къимет­диз таъсирна. Ноутбукар мадни ужуз хьун мумкин яз гьисабзава.

Яхунардай суьрсетар

Бедендин заланвал кьезиларун патал салатрик кутазвай соу­сар ерилубур хкяна кIанда. Ихьтин фикир пешекар-пегьризчи Л.Бурака малумарнава. Ада “Eat This, Not That” чешмедиз фад яхун хьун патал важиблу суьрсетрикай ихтилатна.

Пешекарди сифте нубатда какайрин тIвар кьунва. Абурун куьмекдалди менфятлу хуьрекар гьазуриз жеда, месела, омлет­. Экуьнахъ маса затIар незвайбурулай тафаватлу яз, какаяр нез­вай ксари чеб яргъалди тух яз гьиссзава.

“Къайгъанахдиз алава жедай салан майвайрикай са шумуд жуьре гьамиша холодильникда аваз хьурай”, — лагьана Бурака. Адан гафаралди, салан майвайрик тухвал яргъалди гьиссдай клет­чаткаяр гзаф ква ва абуру тIуьрди иливарунин кардизни хъсан патахъай таъсирзава.

Маса къачузвай соусрин чкадал Л.Бурака лаймдин, лимондин мижедикай жува гьазурнавай затIар ишлемишун теклифзава. Гьа са вахтунда ада ширинлухар емишралди (ичералди, чуьхверралди) эвезун меслятзава.

Гьазурайди — К.Ферзалиев