РД-дин Кьил Сергей Меликован Указдалди Агъа СтIалрин хуьряй тир кьве шаирдиз — Сажидин Саидгьасановазни Фейзудин Нагъиеваз — “Дагъустан Республикадин халкьдин шаир” лагьай тIварар ганва
Сажидин Саидгьасановаз и тIвар гунин гьакъиндай Указдал къул чIугунвайди Сергей Меликова 31-январдиз вичин телеграм-каналда хабар гана. Ингье ада вуч кхьенватIа:
“…Сажидин Саидгьасанован шиират уьмуьрдикай, адан ивиррикай, Ватандикай я. Ада алай йисуз чна 100 йисан юбилей къейддай чи чIехи ватандаш Расул Гьамзатова кутур эдебиятдин виридалайни хъсан адетар давамарзава.
Амма Сажидин Саидгьасанов вичин хайи районда ва адалай къецепатани тек са и кардал машгьур туш. Адан алахъунар себеб яз медениятдин “Куьредин ярар” центр арадал атана, гьа ихьтин тIвар алаз газет акъатзава, СтIал Сулейманан тIварунихъ галай мергьяматлувилин фонд кардик акатна.
ЦIи адан 90 йис тамам жезва. Анжах ам руьгьдалди жегьил я, адан викIегьвал, къенин йикъан гьаларив ам эгечIзавай къайда чпел гьейранвал авуниз лайихлу я.
Гьуьрметлу Сажидин Саиджамалович, Куь руьгьдин камаллувили, уьмуьрдин тежрибади инлай кьулухъни Дагъустандин ва Урусатдин итижриз къуллугъдайвал, Квехъ чандин сагъвал хьурай!”
Фейзудин Нагъиеваз и гьуьрметдин тIвар ганвайди гьеле алатай йисан 2-декабрдиз акъуднавай ва РД-дин Кьилин официальный сайтда чапнавай 228-нумрадин Указда къалурнава. Кьилди къачуртIа, документда кхьенва: “Дагъустан Республикадин халкьдин шаир” тIвар гун:
“Нагъиев Фейзудин Рамазановичаз — кьилин образованидин “Дагъустандин государстводин университет” ФГБОУ-дин кафедрадин профессордиз”.
XX асирдин Гомер СтIал Сулейманан шииратдин багъда бегьердал атай кьве шаирни неинки са Дагъустанда, гьакIни адалай къецепатани машгьур я. Сажидин Саидгьасанованни Фейзудин Нагъиеван шиирар маса чIалариз элкъуьрнава, абурун къелемрикай гзаф кьадар ктабар хкатнава. Кьведани Дагъустандин эдебият вилик финик чIехи пай кутунва.
“Лезги газетдин” редакциядин коллективди къелемдин дустариз, бажарагълу шаирриз “Дагъустан Республикадин халкьдин шаир” тIвар мубаракзава. Къуй квехъ чандин сагъвал, яргъи уьмуьр, мадни еке агалкьунар хьурай!
«Лезги газет»
