Къадагъадиз фикир ганач
Дербент районда автомобиль поездда акьуникди чкадин агьали кьена. Агьвалатдикай РД-дин МВД-дин пресс-къуллугъди хабар гана.
Алай йисан 20-январдиз Белиждин ракьун рекьин станциядал “ВАЗ-21093” машин гьалзавай 25 йисан яшда авай чкадин жегьилди, семафордин къадагъадин сигнал гьисаба кьун тавуна, ракьун рекьелай элячIдай чкадилай гьална ва адан улакь “Самур-Дербент” ракьун рекьин маршрутда гьерекатдик квай пар авай поездда акьуна.
ДТП-дин нетижада “ВАЗ-21093” машин гьалзавайда залан хирерикди агьвалат кьиле фейи чкадал чан гана. И делилдай суд-силис авун патал материал кIватIнава.
Республикадин МВД-ди рекьера гьерекатзавай вирибуруз мад сеферда мукъаятвал хуьниз эвер гузва.
Шак физвайди кьуна
Леваши райондин дежурный частуниз “ВАЗ-2106” автомобилдин запчастар ва аккумуляторар чуьнуьхнавай делилдиз талукь арза гваз 65 йисан яшда авай Агъа Чугли хуьруьн агьали фена, хабар гузва Дагъустандин МВД-дин телеграм-каналди.
Хьанвай зияндин кьадар 15 агъзур манатдиз барабар я. Полициядин къуллугъчийри Леваши хуьруьн 17 йисан яшда авай жегьил тайинарна ва отделдиз хкана.
Шак физвайда угъривал хиве кьуна. Чуьнуьхай затIар адавай вахчунва. Жегьилдин гафаралди, йифен вахтунда ада бубадин машин гьална, къунши хуьруьз фин кьетIна. И чIавуз адаз ана са кIвалин патав акъвазарнавай машин акуна. Масадаз маса хгунин мураддалди жегьилди машиндай запчастар чуьнуьхна.
И делилдай материал кIватIнава. Силис давам жезва.
БалкIан яна
Леваши районда 25 йисан яшда авай чкадин агьалиди гьалзавай машинди рекьел экъечIнавай балкIан яна. Нетижада улакь гьалзавайдахъ галай, 26 йисан яшда авай жегьил кьена, хабар гузва МВД-дин пресс-къуллугъди.
Агьвалат алай йисан 21-январдин нянихъ Леваши районда, “Махачкъала-Вини Гуниб” рекьел кьиле фена. “ВАЗ-211440” автомобиль гьалзавай жегьилди улакьрин гьерекат авай чкадал атанвай балкIан яна ва нетижада машин 15 метрдин кьакьанвал авай дагьардиз аватна.
ДТП-дин нетижада машинда авай пассажир, 26 йисан яшда авай чкадин агьали, тIарвилер хьуникди чкадал телеф хьана. Шофер азарханадиз агакьарна.
И делилдай суд-силис авун патал материал кIватIнава.
«Лезги газет»
