Квез чидани?

—           Дубай ОАЭ-да виридалайни чIехи ва инсанар сихдаказ яшамиш жезвай шегьер я. Шегьердин умуми майдан 3885 квадратный километрдикай ибарат я. Ана 3 миллионни 300 агъзурдалай виниз инсанар яшамиш жезва.

—           Уьлкведин меркез Абу-Даби ятIани, Дубай меж­дународный центр яз машгьур я.

—           Дубайда официальный чIал араб чIал я.

—           Адетдинди тушир и шегьер къумлухда авай халисан оазис хьиз я.

—           Дубай дуьньяда жегьил, амма фад еримлу ва чIехи жезвай шегьеррикай сад я.

—           Исятда Дубай алай мулкарал инсанар чи девир­дал къведалди 2500 йисан вилик яшамиш жезвай, амма алатай асирдалди анаг инфраструктура авачир гъве­чIи шегьер тир.

—           1990-йисарин эхирра 2000-йисарин эвел кьилера Дубайда минараяр, зурба отелар, дуьньяда авачир хьтин кьакьан дараматар эцигунин кIвалахар кьиле фена.

—           Исятда шегьерда 120 метрдилай гзаф кьакьан­вал авай 38-далай виниз дараматар ава.

—           ЧIехи хьунин еришрал гьалтайла, Дубай дуьньяда кьвед лагьай чкадал ала. Сад лагьай чкадал -Ки­тайдин Шанхай.

—           ОАЭ-да нафт хкуддай чкаяр дуьздал акъудайдалай кьулухъ Дубай гьасятда дуьньядин чIехи ше­гьер­рикай садаз элкъвена. Гьакъикъатдани, шегьер гьар са инсан гьейранардайди я.

—           Эхиримжи йисара Дубай иллаки туристри гзаф фикир желбзавай чка хьанва.

—           Дубайда авай Бурдж-Халифа минарадин кьакьанвилел 828 метр ала. Адан кьакьанвал Москва-Ситидилай 3 сеферда артух я.

—           Дубай са куьруь вахтунда еке дегишвилер арадал къведай чка я. 2009-йисуз туькIуьрай метрополитен 42 станциядикай ибарат тир. Ам 18 вацран муддат­да туькIуьрна.

—           Дубай лап чими чка я. Гьавиляй ана автобусрин гзаф остановкаяр кIевирнавайбур ва кондиционеррин куьмекдалди къайивал хуьзвайбур я.

—           Дубайда чкадин агьалийрилай 7 сеферда артух къецепатан агьалияр ава.

—           Эмиратрин гзаф агьалияр къулайдаказ яшамиш жезва. Ана кIвалин, медицинадин къуллугърин ва образованидин гьакъи гьукуматди гузва. Идалайни гъейри, гзафбурухъ хъсан мажибар къвезвай кIвалах ава.

—           Дубайда кIвалахдай гьафте гьяддилай башламиш жезва. Жуьмя ва киш ял ядай йикъар я.

—           Дубайда дишегьлияр патал абуру гьалзавай махсус таксияр кардик ква.

«Лезги газет»