СССР чи виридан хайи Ватан тир. Ана чун чIехи хьана, чирвилер къачуна, азад халкьарихъ галаз дуствилелди яшамиш хьана. Амма уьлкведин, халкьдин хаинар хьайи Хрущева, Горбачева, Кравчука, Шушкевича, Ельцина, абурухъ галаз зил кьурбуру зурба уьлкве чукIурна, тарашна. ЯтIани халкьдин рикIе СССР гаф яшамиш жезва.
ИкI, тарихдихъ галаз алакъалу мярекат Кьасумхуьрел кьиле фена. Залда авайбурун вилик КПРФ-дин СтIал Сулейманан райондин отделенидин председатель Валентин Ханбалаев рахана ва ада СССР-дин тарихдикай суьгьбет авуна.
Адалай кьулухъ сад-садан гуьгъуьналлаз и цIарарин автор, са шумуд йисуз КПСС-дин СтIал Сулейманан райондин сад лагьай секретарвиле кIвалахай Алимет Мейланов, райондин администрациядин къуллугъчи Рамазан Абдулазизов, нуьцIуьгъви МутIалиб Сефиханов рахана. Вирида дуьньяда СССР хьтин къудратлу, ислягь гьукумат тахьайди, адан къуватдикай вири уьлквейриз, пачагьлугъриз хабар аваз хьайиди, адакай гьамиша вил къягъиз хьайидини къейдна. СССР 70 йисуз яшамиш хьана. Тарихда адан тIвар къизилдин гьарфаралди кхьидайдал шак алач. Эгер ам амайтIа, вири халкьар сад ва мадни къуватлу жедай, экуь, ачух рехъ акваз, виликди фидай.
Ахпа хуьре-кIвале, обществода активвал къалурзавай, хийирлу крарик чпин пай кутазвай 7 касдив “СССР-дин 100 йис” юбилейдин медалар, 6 касдивни КПРФ-дин ЦК-дин грамотаяр вахкана.
Райсудин Набиев, зегьметдин ветеран,
РФ-дин журналистрин Союздин член
