Телевизордай къалурзава аслан, зурба гамишдин къвал кьуна, алахъзава ам ярхариз, ахъайзавач. А гьайван, кьуд кIвачни чиле акIурна, язухдаказ муа-а ийиз акъвазнава. Куьмек-чара кIанзава. Эцязавач вичин еке кIеви крчар алай кьил а вагьшидин къвала. КьатIуннани кIандачни гьа кар. Гьайван я. Гьайвандихъ фагьум-кьатIун авани?
Украинадин президент В.Зеленскийни инсан тушни кьван. Адахъ вучиз авач фагьум-кьатIун?! Са чIуру кьили, са няс рикIи тамаш садра гьикьван инсанрин рикIер тIарзаватIа, гьикьван шегьерар-хуьрер кукIварзаватIа! Ибур вири гьа са кьилин терсвал, къизмишвал, авамвал я. Я чан жемятар-халкьар, ихьтиндаз регьбер гьикI лугьун, вичин ватандашар тармар ийиз, РагъакIидай патан ампайрин чIала авайдаз?
Ишлемишзава ам атIабуру чпин хийирдиз. Ам ахъайич абуру. Абурни ахмакьар туш. Гъил кьазва — парарни язава. Абуру гузвай куьмекар бадгьавая фидайди туш. Са югъ къведа “хкваш буржар селемарни алаз” лугьуда. Ахпа я ман кьил кьадайди, низ чидай, низ чидай лугьуз.
Зеленский, гьикьван абуру чин ачухайтIани, гьикьван куьмекар гайитIани, гъурбат къуват туш, диндал хъша фад! Эвел гьарай хуьр, жуван халкь, ватан-макан я! ЯцIа акIайла, тахсирар Урусатдик кутаз алахъмир. Квез са шумудра теклифайди я меслятдалди месэлаяр гьялун патал.
Яраб са легьзеда кьванни Аллагь рикIел къвезватIа куь?! Аллагь рикIел алайда са тахсирни квачир инсанар — халкьар терг ийидани?!
Чна дамахзава чаз гайи тербиядал, чирвилерал. Яраб, В.Зеленский, куь рикIел диде-буба къвезватIа? Авайди хьиз аквадач. Квез дяве бахт я лугьуз тарсар ганвай хьтинди я.
Инсан тIебиатди арадал гъанвайди я и гуьзел тIебиатдал гьейран хьун, дуьз яшамиш хьун патал, гъил гъиле кьуна, хатурлу, мергьяматлу хьун патал, сада-сад хуьн патал. Дявеяр-мидявилер патал — ваъ!
Исятда физвай дяве анжах США-диз хийирлу я. Тарихдани гьакI хьайиди я. Жегьил чанар я физвайди. Дяве артистрин сегьне туш. Гьикьван хьуй дявеяр, къурбандар?! Акьван ивияр кужумнавай, акьван цIаяр-гужар акунвай чилери квез, нацистар, техил, емиш хгуда жал?! Жувандал луьле туькIуьрун, телефун?! АтIабурун чIала гьатна, суст хьанвай куь ниятдик стIун инсанвилин гьисс кумайди хьиз аквазвач, президент Зеленский.
Гьеле 50-60 лагьай йисара чаз тарсара писатель Н.Островскийдин пара маналу гафар-цIарар чирнай. Ада лагьанвай хьи, уьмуьр садра я гузвайди. АкI яшамиш хьана кIанда хьи, ахпа дерт-азабар тежедайвал… Адаз чизвай уьмуьрдин къадир. Ам халкьарин патай аферин-чухсагъул алаз рагьметдиз фена. Зеленский, вун вуч гваз фидайвал я агъа дуьньядиз? Вун а чарадан, патандан чIала ава. Чарадан чIала авайда, са арада тарцяй аватайда хьиз, кьил кьада…
Нурудин Насруллаев
