Махсус серенжемдикай
ДНР-дин кьилин везифаяр вахтуналди тамамарзавай Д.Пушилина 24-январдиз малумарайвал, Украинадин кьушунриз Артемовскдиз фидай анжах са рехъ я амайди, муькуьбур агалнава. Идакай “Россиядин газетдин” телеграм-каналди хабар гана.
Идалай вилик ада малумарайвал, Клещеевкадинни Артемовскдин кьиблепатан важиблу чкаяр кьуналди, Россиядин кьушунар виринрай виликди физва. Д.Пушилинан делилралди, Украинадин кьушунриз Артемовскдизни Марьинкадиз куьмекдин алава кьушунар ракъурзава. И мулкара къати женгер давам жезва.
24-январдиз РФ-дин оборонадин министерстводи малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 376 самолет ва 203 вертолет, зенитный ракетайрин 402 комплекс, пилот галачиз лув гудай 2944 аппарат, 7614 танк ва дяведин маса машинар, РСЗО-дин 988 машин, артиллериядин ва маса 3898 яракь, военный махсус 8159 автомашин тергна.
Танкар гун мумкин я
Чарасузвал хьайитIа, немсерин “RheinmetaII” тешкилатдивай Украинадиз 139 “Leopard” танк гуз жеда. “Новости” РИА-ди хабар гузвайвал, ихьтин фикир тешкилатдин векилди малумарнава.
Къейдзавайвал, тешкилатдивай “Leopard 2A4” жуьредин 29 танк майдиз ва я апрелдиз, гуьгъуьнлай мад 22 танк алай йисан эхирра ва я 2024-йисан эвел кьилера гуз жеда. Тешкилатдин векилди мадни малумарайвал, гьакIни 88 “Leopard 1” танк ракъуриз жедай мумкинвал ава.
Къейд ийин, Украина гужлу яракьралди ацIурзавай США-дини Германияди гьелелиг украинвийриз чпин “Abrams” ва “Leopard” танкар ганвач. Амма Великобританияди “Challenger” танкар ракъурнава.
РФ-дин къецепатан крарин министр С.Лаврова идалай вилик къейд авурвал, Украина патал ракъурзавай яракьар Россиядин Яракьлу Къуватар патал къанундалди тергдай макьсаддиз элкъведа. Украинадиз яракьар ракъуруналди, ада НАТО-дин уьлквеяр “цIув къугъвазва” лагьанай.
Дурум гуз жедач
Тамамвилелди США-дилайни Европадилай аслу тирвиляй Украинади Россиядин вилик магълубвал хиве кьун герек я. “Новости” РИА-ди хабар гузвайвал, ихьтин фикир Китайдин “Sina” порталда чапнавай макъалада лагьанва.
“Россиядихъ оборонадинни промышленностдин комплексдин гужлувал артухардай мумкинвал ава. И делилди Россиядивай Украинадихъ галаз къалмакъалдиз яргъалдини дурум гуз хьуникай хабар гузва. РагъакIидай патан уьлквейри Россиядин армия яракьар авачиз амукьуник гьич умудни кутун тавурай, ам жери кар туш”, — лагьанва макъаладин авторди.
Адан фикирдалди, США-дини Европади чпин умудар буш акъатнавайдакай магълуб хьунин месэла гьеле вилик кума. Къейднавайвал, Украина кумукьунин часпардал ала.
Россияди алатай йисан 24-февралдилай Донбасс азад авунин макьсаддалди Украинада военный махсус серенжем кьиле тухузва. Къалмакъалдин вахтунда Америкадини НАТО-дик квай адан амадагри Киевдиз яракьрин ва миллиардралди долларрин куьмекар гузва.
“Махсус серенжемдин аялар”
ЛДПР-диз “Махсус серенжемдин аялар” законопроект Госдумадиз теклифиз кIанзава. Законопроектда къалурнавай дережа СВО кьиле физвай зонада (цIийи 4 регионда) яшамиш жезвай 17 йисал кьван яшара авай аялриз гуз жеда. “Новости” РИА-ди хабар гузвайвал, ихьтин фикир партиядин пресс-къуллугъди раижнава.
ТIвар кьунвай дережадив кьурвал, ЛДПР-диз аялриз талукь тир кьезилвилерни тайинариз кIанзава.
Деведи кIасна
Ростовдин областдин Батайск шегьерда деведи рекьяй физвай инсандин гъил кIасна. Идакай “Батайское время” чешмеди хабар гана.
Векь незвай деве акурла, 40 йисан яшда авай агьалидиз адал гъил алтадиз кIан хьана. Амма кьве мандав алай деведи агьалидин гъил сарарик кутуна ва ам чилера атадна. Агьалиди гуьгъуьнлай вич пиян гьалда авайди тир хълагьна. Тади куьмекдиз эверна, ам азарханадиз агакьарна. Духтурри адан гъил тамамдиз гуьнгуьна гьат хъувун тавунни мумкин я лугьузва.
Ичкидивай къерех хьухь
Ички квай затIар са шумуд юкъуз галаз-галаз хъвайитIа, инсандиз беден тамамдиз гуьнгуьна хутадай мумкинвал жедач. Идакай медицинадин “СберЗдоровье” онлайн-сервисдин терапевт А.Хрипковади ихтилатнава.
“Мукьвал-мукьвал, кьадардилай гзаф ички ишлемишуникди инсандин ивида токсинар (ацетальдегид) кIватI жезва”, — лагьана ада. Алава хъувурвал, ички себеб яз, инсандин ивидик шекердин кьадар артух, идан нетижадани инсан зайиф ва къуватсуз жезва.
Идалай вилик уьлкведин меркездин здравоохраненидин ва Россиядин Минздравдин пешекар-духтур Е. Брюна россиявийриз пиянвилелай кьулухъ кефияр чIур хьайи дуьшуьшра къатух, ширин тушир чай, келем кутунвай уьцIуь яд хъун ва холодец тIуьн теклифнай.
Гьазурайди — К.Ферзалиев
