Дагъустанда полициядин пуд
къуллугъчидик инсан кьинай тахсир кутунва
Махачкъала шегьердин Советский райондин суддин къарардалди полициядин пуд къуллугъчи вахтуналди азадвиликай магьрумнава. Абурук кIвалахдин рекьяй чпиз ганвай векилвилерин сергьятрилай элячIунай тахсир кутунва.
ТАСС-ди, республикадин Силисдин Управленидин органрин пресс-къуллугъдал асаслу хьана, раижзавайвал, полициядин къуллугъчийри хабарар кьун патал отделдиз алай йисан 20-январдиз республикадин меркездин кьве агьалидин арада кьиле фейи чуьруькдин шагьид хьайи кас хкана. Къалмакъал хьайибурукай сада муькуьди тапанчидай янавай. Хирер хьайиди духтурханадив агакьарна, тапанчидай ягъайди катна. Къанун-къайда хуьдай органрин векилриз шагьиддиз катайди чуьнуьх хьанвай чкадикай хабар авайди хьиз авай. Адай герек малуматар акъудун патал полициядин къуллугъчийри шагьиддиз, гатаз, ягъиз, азабар гана ва хьайи тIарвилерикди гуьгъуьнлай ам кьена.
И дуьшуьшдин гьакъиндай уголовный дело къарагъарнава. Идалай гъейри, тахсир кутазвай къуллугъчийри кIвалахзавай Советский райондин полициядин отделдин начальникни адан пуд заместитель кIвалахрилай алуднава.
Чи мухбир
