—        ДуркIунра къванер авайла, агъадихъ галай рецепдикай менфят къачуда. Гатун халидин са стакандавай цилер эфирна, як регъведай машиндай авадарна, 2 л банкадиз вегьена, ргазвай яд илична са суткада тада. Ахпа 10 юкъуз йикъа 3-4 стакандавайди ишлемишда. ЦIуд юкъуз ял яна, мад тикрар хъийида.

—        Далу тIазвайла, хрендин таза пешерал ргазвай яд илична, тIазвай чкадал эцигна, винелай целлофандалди ва чими шарфуналди кIевирна, са сятда тада. Мадни тIал секинарун патал кьел эфирна са гъвечIи турбадиз вегьена, тIазвай чка­дал эцигда. Кьел къайи жедалди тада.

—        Вишнияр гзаф азаррин дарман я. Абуру нервный система къайдадик кутада, инфаркт хьуникай хуьда, рикIинни дамаррин кIвалах хъсанарда, ивидин гемоглабин хкажда.

—        Жалгъаяр тIазвайла, стакандиз са куьлуь кIус камфара вегьена, 1/3 стакандавай скипидар алава хъувуна, винелай спирт илична, хъсандиз хуькуьрда. Ахпа ам тIаз­вай жалгъайривай гуьцIда.

—        РикI тIазвайла, капан юкьвал пихтадин ягълудин 10 стIал вегьена, рикI авай патавай гуьцIда. Мадни ксудалди вилик валерианадин настойкадивай ни чIугвада.

—        МетIер тIазвайла, ксудалди вилик анривай бальзам “звездочка” гуьцIна, чими шарф алчудна та­да­. Экуьнахъ тIалдин гелни амукьдач.

—        Кьил тIазвайла, хуьрекдин са тIуруна авай къарачиперал (душица) 0,5 л ргазвай яд илична, 30 декьи­кьада тада. Ахпа йикъа 2 сеферда 1/2 стакандавайди хъвада.

—        ЧIулав ва я къацу чай демда туна, аниз пуд тупIув кьур пурнияр вегьена хъвайитIа, кьилин тIал секин жеда.

Мадни кьил тIазвайла,  хуьрекдин са тIуруна авай зверобойдин хъчарал са стакандавай ргазвай яд илична, 15 декьикьада ргада. Ахпа ам куьзна, йикъа пуд сеферда хуьрекдин са тIуруна авайди хъвада.

—        КуручIар (десны) тIазвайла, анривай дамард пешерин миже гуь­цIда. ГьакIни хуьрекдин са тIуруна а­вай пешерал са стакан ргазвай яд илична, чимидаказ сиве экъуьрай­тIа, сарар ва куручIар мягькем жеда.

—        Сарар, сухвар тIазвайла, чуьхвена кьурурнавай дамард пешерин дувулдин са гъвечIи кIус япа туртIа, 30-40-декьикьадилай тIал секин жеда.

—        ДуркIурнар сагъламбур хьун патал 100 г верхи тарцин пешерал 2 стакандавай яд илична, 6 сятда та­да (и вахтунда яд къацу жеда). Ах­па­ ам куьзна, йикъа пуд сеферда фу недалди 1/2 стакандавайди ишлемишда.

—        Кьил тIазвайла, кIвалахдин бажарагъ хкажун патал хуьрекдин 4 тIуруна авай кьурурнавай календуладин пешерал ва гьакьванни кьурурнавай пурнийрин пешерал 0,5 л яд илична, 30 декьикьада за­йиф цIал эцигна ргада. Ахпа ам куьзна, са тIи­мил вирт хуькуьрда, ам цIрай­далай гуьгъуьниз къаришмадиз са литр эрекь алава хъийида ва йикъа са сеферда хуьрекдин са тIуруна авайди хъвада..

—        Шекердин азар авайла, 2 вацран вахтунда гьар юкъуз хуьрекдин 2 тIуруна авай чуьлдин некьияр ишлемишайтIа, ада ивидик квай шекердин кьадар къайдадиз хкида.

Гьазурайди — Надият Велиева