Алатай гьафтеда Дагъустандин Кьил Сергей Меликов сагъламвилин мумкинвилер сергьятламишнавай, чпин яшар 18 йисалай алатнавай жегьилар патал республикадин меркезда реабилитациядин центр эцигун пландик кутунвай майдандиз тамашна…
Реабилитациядин центр эцигунин къарар и жуьредин идараяр республикада авачирвиляй региондин Кьили набутрин крарай Советдин заседанидал алатай йисан декабрдиз раижнай. Ам сагъламвал гуьнгуьна хутадай Республикадин азарханадин (РБВЛ — виликан грязелечебница) мулкарин 2 гектардин чилел эцигда.
Малум хьайивал, реабилитациядин центрада (ина суткадин кьиляй-кьилиз амукьдай — 210 ва йикъан стационардин 40 чарпай жеда) йиса 4 агъзурдалай гзаф жегьилриз чпин сагъламвал гуьнгуьна хутадай мумкинвал жеда.
ЦIийи идарада са шумуд (консультацийрин ва диагностикадин, неврологиядин ва травматологиядин, соматикадин, реанимациядин ва интенсивный терапиядин) отделенияр кардик акатда.
Реабилитациядин центр эцигунин проект туькIуьрунин тапшуругъ тестикь хьанва. Мукьвал вахтара ам 2023-йисуз ва 2024-2025-йисарани пландик кваз Республикадин инвестицийрин программадик кутун патал РД-дин экономикадин ва мулкар вилик тухунин рекьяй министерстводиз рекье твада.
Къейд авун лазим я хьи, вичин мулкарал жегьилриз реабилитациядин центр эцигун пландик кутунвай сагъламвал гуьнгуьна хутадай Республикадин азархана 1964-йисуз эцигна. Ана 250 чарпай кардик ква. Азарханада нервийрин, кIарабдинни (мышечный )жукIумрин къурулушдин кIвалах къайдадикай хкатнавай ва соматикадин азарар авай чIехи яшарин ксар сагъарзава. Ина физио ва кьарадалди сагъардай, терапиядин, неврологиядин, гинекологиядин отделенияр, сагъламвал мягькемардай массаждин ва физкультурадин, стоматологиядин ва рефлексотерапиядин кабинетар, тренажеррин зал кардик ква, бассейн, чпин лаборатория ава. Азарханада йиса 3 агъзурдалай виниз азарлуйрив пешекарвилин куьмек агакьарзава.
Идалайни гъейри, Сергей Меликова Украинада военный махсус серенжемда (СВО) иштиракай военный рекьяй къуллугъчияр патални реабилитациядин кьилдин центр эцигунин теклифар гъун тапшурмишна.
РикIел хкин: Россиядин Президент Владимир Путина, СВО-да иштиракзавай военный рекьяй къуллугъчийрин дидейрихъ галаз кьиле тухвай гуьруьшдин нетижаяр кьадайла, военный махсус серенжемда иштиракай ксарин сагъламвал гуьнгуьна хтун, абурув медицинадин куьмек агакьарун патал медидарайрикай менфят къачунин мумкинвилерикай теклифар гъун тапшурмишнай.
Р. Рамалданова
