Тренерриз талукь яз
Спортдин мектебра, маканра аялриз чирвилер гузвай тренерриз педагогдин дережа гуда. Муаллимриз авай хьтин ихтиярар, яшайишдин заминвилер хьунилай гъейри, тренеррин хиве талукь тир везифаярни гьатзава.
Тренерар-муаллимар гьар 2 йисалай фад тушиз ва гьар 5 йисалай геж тушиз са сеферда аттестация ийида. 1-январдилай къуватда гьатнавай и къанун аялринни жегьилрин спорт еримлу авунихъ элкъуьрнава.
Волонтерриз куьмек
Чпин хушуналди хъсан крар кьилиз акъудзавайбурун (волонтеррин) уьмуьрдиз ва сагъламвилиз зарар хьайитIа, абуруз эвездин такьатар хгуда. Ихтилат, месела, волонтерри ЧС арадай акъудунин, цIай хкадарунин, къутармишунин кIвалахра иштиракай дуьшуьшрикай физва. Идалайни гъейри, 1-январдилай волонтерривай алакъадин къуллугъдин харжийрин эвез вахчуз жедай ва адаз талукь НДФЛ фикирда кьан тийидай къанунар къуватда гьатнава.
Дарманар къачунин кьезилвилер
Набутривай кьезилвилерин (льгота) дарманар, медицинадин затIар ва недай махсусдаказ гьазурнавай суьрсетар электронный сертификатдин куьмекдалди къачуз жеда. ЗатIарин сиягь региондин гьукумдин органри тайинарзава.
ТIимиларнава
Киридин гьакъиндай кутIуннавай икьрар дегишарунин ва я къуватдай вегьинин документ ЕГРН-да регистрация авунин госпошлинадин кьадар кьилдин ксар патал гила 350 манат хьанва, тешкилатар патал — 1 агъзур манат.
“Госкъуллугърин” куьмекдалди
Багъманчивилинни саларбанвилин коммерциядинди тушир тешкилатрин (СНТ) умуми собранийрал анрик квай векилривай, “Госкъуллугъар” порталдикай менфят къачуна, заочный къайдада сес гуз жеда.
Этномеденият хуьн
Чкадин гьукумдин органар меденият хуьнин, еримлу авунин, чирунин, гьакIни субъектдин мулкара яшамиш жезвай РФ-дин халкьарин этномедениятдин жуьреба-жуьревал хуьнин серенжемар кьабулуниз мажбур жезва.
Хъсандиз ял ядайвал
Аялри ял ягъунин крар тешкилуник гила региондин гьукумдин органарни (медениятдин, спортдин ва туризмдин хилерин) экечIда. И карди ял ягъунин ери хъсанарда ва гатун вахтунда аялриз алава мумкинвилер гуда.
ЦIийи къанун 9-январдилай къуватда гьатнава.
Чи мухбир
