13-январдиз Росгвардиядин Дагъустан Республикада авай Управленидин начальникдин заместитель, полициядин полковник Арсен Абдуллагьова республикадин массовый информациядин такьатрин векилриз Россиядин печатдин югъ тебрикна…
Ведомстводин векилди территориальный органдин ва республикадин СМИ-рин векилрин арада сада-садаз ихтибарвал къалурунин алакъаяр арадал атанвайди къейд авунихъ галаз сад хьиз, журналистриз арада сих алакъа аваз кIвалахунай, республикадин агьалийрив вахтунда ва гьакъикъатдив кьур хабарар агакьарунай сагърай лагьана.
Арсен Абдуллагьова инлай кьулухъни, ихтибарлувал квадар тавуна, ачухдаказ санал ва бегьерлудаказ кIвалахунин умудлувал къалурунихъ галаз сад хьиз, Росгвардиядин чкадин Управлениди регионда алай йисуз кьиле тухун пландик квай зурба мярекатрикай суьгьбетна, журналистриз анра иштиракун теклифна.
Эхирдай офицерди Росгвардиядин РД-да авай Управленидин начальник Александр Орехован тIварунихъай республикадин изданийрин кьилин редакторрив ва журналистрив чухсагъулдин чарар, къиметлу пишкешар вахкана. ИкI, виниз тир пешекарвал къалурунай, Росгвардиядин РД-да авай Управленидин подразделенийрин къуллугъдинни женгинин кIвалахдикай региондин агьалияр хабардар авунай ва пешекарвилин суварихъ галаз алакъалу яз шабагьриз лайихлу хьайибурун арада “Лезги газетдин” кьилин редактор Мегьамед Ибрагьимовни ава.
Рагнеда Рамалданова
