Пул авай кисе чуьнуьхна
Махачкъаладин 24 йисан яшда авай агьалидал пул авай кисе чуьнуьхунай шак физва. Идакай РФ-дин МВД-дин пресс-къуллугъди хабар гана.
Алай йисан 13-январдиз Махачкъаладин Советский райондин полициядин отделдиз арза гваз чкадин 23 йисан яшда авай агьали атана. Жегьилди хабар гайивал, малум тушир касди 45 агъзур манат пул авай адан кисе чуьнуьхна. Пулунин такьатрихъ адаз вичин машин ремонт ийиз кIанзавай.
Оперуполномоченный къуллугъчиди и чIуру кар авуна лагьана хиве кьур 24 йисан яшда авай махачкъалави тайинарна ва ам отделдиз хкана.
Жегьилди ихтилатайвал, зиян хьайиди адан дуст я. Нубатдин сеферда сад-садаз акурла, таниш вилик кваз къекъведайла, чуьнуьхунин ният авайда адан кIуртунин жибиндай кисе акъудна. Ахпа ада, хиве кьурвал, вири пул вичел алай буржар ахлудуниз харжна.
И делилдай суд-силис авун патал материал кIватIнава.
Угъривал
Алай йисан 11-январдиз Избербашдин полициядин отделдиз арза гваз 33 йисан яшда авай чкадин агьали атана. Ада лагьайвал, малум тушир касди, кафедиз гьахьна, анай садакьаяр патал кIватIнавай 7 агъзур манат пул авай ящик чуьнуьхна.
Полициядин къуллугъчийри и угъривал авуна лагьана хиве кьур чкадин 26 йисан яшда авай агьали тайинарна ва ам отделдиз хкана.
Агьалидин гафаралди, ада кафеда экв тахьун патал сифте нубатда электрощит хкудна, гуьгъуьнлай монтировкадалди ракIарин тIапIар ахъайна ва къеняй садакьаяр патал кIватIнавай пул авай ящик акъудна. Полициядин къуллугъчийри пулунин са пай вахчуна, муькуь пул тахсиркарвал авунай шак фенвайда вичин игьтияжар патал серфна.
Тахсиркарвилин лишанриз килигна, РФ-дин УК-дин 158-статьядин 2-паюнин “б” пунктунай (угъривал) уголовный дело къарагъарнава.
Яракь вахчуна
РД-дин МВД-дин УУР-дин ОБОП-дин къуллугъчийри республикадин УФСБ-дин къуллугъчийрихъ галаз санал къанунсуздаказ ишлемишзавай яракь ва патронар вахчуна.
Къумторкъала районда полициядин къуллугъчийри серенжемар кьабулдай вахтунда 22 патрон авай Калашникован автомат дуьздал акъудна. Тахсиркарвилин шак финай полицейскийри кьуд агьали кьуна.
Шак физвайбур яшамиш жезвай чкайрай (Къумторкъала ва Буйнакский районар) полициядин къуллугъчийриз 200 кьван патрон, кьве РГД-5 гранат, ИЖ тфенг ва тапанчи жагъана. И делилдай материал кIватIнава.
Гьазурайди — К.Ферзалиев
